Төлөй нэһилиэгэр алтынньы 6 күнүгэр икки улахан суолталаах тэрээһин буолла. Оҕо тустуу саалатын үөрүүлээх арыллыыта уонна иккис төгүлүн нэһилиэк олохтоохторун итэҕэлин ылан баһылык буолбут Игорь Николаев инаугурацията ыытыллынна.
Төлөй орто оскуолатыгар 2000 сыллаахха өрөспүүбүлүкэтээҕи “Үтүө дьыала” хамсааһыҥҥа сөп түбэһиннэрэн Егор, Татьяна Адамовтар дьиэ кэргэн ыҥырыы таһааран нэһилиэккэ тустуу саалатын тутан бэлэхтээбиттэрэ. Саалабыт үлэҕэ киирэн, оскуолабытыгар Чурапчытааҕы Д.П. Коркин аатынан ыспартыыбынай оскуола филиала арыллан, өрөспүүбүлүкэ араас муннугуттан оҕолор үөрэнэ кэлбиттэрэ. 2017 сыллаахха бу тутуу таас оскуола, интернат аттыгар көһөрүллүбүтэ.
Атырдьах ыйын 30 күнүгэр «Образование» бырайыак чэрчитинэн, «Успех каждого ребенка» национальнай бырайыак иһинэн Төлөй орто оскуолатын ыспартыыбынай тустуу саалата перепрофилирование бырагыраамаҕа сөп түбэһиннэрэн, иккистээн тыын ылан, үлэҕэ киирдэ. Манна эбии быйыл пристрой тутуллан, толору хааччыллыыта ситэриллэн –хоторуллан, ааспыт нэдиэлэҕэ элбэх ыалдьыт тумсэн алгыс түһэриллиннэ. Бу тутууну, Бэргэн Жергин биригээдэтэ аукционна кыайан үлэҕэ киллэрдэ. Аныгы олох тэтимигэр эппиэттиир оҕо сынньанар, эт-хаан өттүнэн сайдар, дьарыктанар тустуу саалатын үөрүүлээх аһыллыытыгар улуус баһылыга Степан Саргыдаев, оскуола попечителлэрэ, биир дойдулаахтарбыт Михаил Гуляев, Иннокентий Аммосов, өрөспүүбүлүкэтээҕи “Үтүө дьыала” хамсааһын бастакы салайааччыта Иннокентий Бочкарев ыалдьыттаатылар.
Бу күн «Төлөй нэһилиэгэ» муниципальнай тэриллии дьаһалтатын баһылыгынан иккис төгүлүн талыллыбыт Игорь Николаев инаугурацията буолан ааста. Үөрүүлээх тэрээһиҥҥэ улуус баһылыга Степан Саргыдаев, Мугудай-Төлөй уокуругуттан дьокутааппыт Дмитрий Захаров, ытыктыыр биир дойдулаахтарбыт Иннокентий Аммосов, Михаил Гуляев уонна Чурапчы, Чыаппара, Мугудай, Хатылы, Бахсы нэһилиэктэрин баһылыктара кыттыыны ыллылар.
Иккис төгүлүн нэһилиэк дьонун-сэргэтин итэҕэлин ылбыт Игорь Владимировичка Төлөй ыҥырыылаах сэбиэтин дьокутааттара, тэрилтэлэрин уонна түмсүүлэрин салайааччылара өйөбүл буолалларын биллэрдилэр. Төлөй нэһилиэгэ түмсүүтүнэн күүстээх, инникигэ сайдыы суолун батыһар.
Онтон саҥалыы тыынынан үлэтин саҕалаабыт саалабыт кэскиллээх кэлэр ыччаттарга сайдыыны кэрэһэлээтин, успуорт үрдүк чыпчаалларын дабайалларыгар күүһү-уоҕу түстүүр олук буоллун!
Евдокия Аржакова