Үөрэх дьыла саҕаланара аҕыйах кэм хаалла. Сайын устата улуус үөрэҕин тэрилтэлэригэр тустаах өрөмүөннэр ыытылыннылар. Быйыл улуус бүддьүөтүттэн үөрэхтээһиҥҥэ 16 мөл көрүллүбүтэ. Биллэн турар, үгүс үп өрөмүөҥҥэ барда.
Туох-ханнык үлэлэр барбыттарын улуустааҕы үөрэх салалтатын начаалынньыгын солбуйааччы Афанасий Максимов кэпсиир:
- Улуус бүддьүөтүттэн көрүллүбүт үптэн 3 мөлүйүөнүгэр Улахан Күөлгэ ыспартыыбынай саала уонна интэринээт дьиэтин өрөмүөннэрэ ыытылла тураллар.
Одьулуун “Күнчээн”, Чурапчы “Березка”, Сылаҥ “Сулусчаан” уһуйааннарыгар, Арыылаах, Хатылы оскуолаларыгар септиктэри өрөмүөннээтилэр. Чурапчы нэһилиэгин “Кэскил”, “Чуораанчык” уһуйааннарыгар санузел уонна баһаарынай емкость, Федотов аатынан МФСК-ҕа (ДЮСШ) косметическай, С.А. Новгородов аатынан Чурапчы орто оскуолатыгар насоснай станция, Арыылаах оскуолатыгар уотунан сырдатыы өрөмүөннэрэ ыытылыннылар.
Өрөмүөн үгүс өттө түмүктэннэ. Хаалбыт Хатылы уонна Улахан Күөл өрөмүөннэрэ атырдьах ыйын 20 күнүгэр түмүктэниэхтэрэ.
«Үөрүү” оҕо дьоҕурун сайыннарар киин урукку “Кыталык” ресторан дьиэтигэр көһүөхтээх. Онно 20 мөлүйүөннээх өрөмүөн үлэтэ саҕаланна. Оттук сезонун баттаһа үлэтэ түмүктэниэхтээх.
Көрүллүбүт үптэн 1,5 мөл солк “Кустук” лааҕыр баазатын хаҥатыытыгар көрүллүбүтэ.
2024 сылтан биһиги улууска федеральнай капитальнай өрөмүөннэр ыытыллыахтара. Ол курдук, И.М. Павлов аатынан Чурапчы орто уонна Г.Д. Протодьяконов аатынан Алаҕар орто оскуолаларыгар капитальнай өрөмүөн барара күүтүллэр.
2025 сылтан уһуйаан капитальнай өрөмүөннэрэ саҕаланыахтара. Онно Мындаҕаайы “Ымыы” уонна Чурапчы “Березка” уһуйааннар бырайыактыыр-сметэлиир докумуоннара уонна экспертизэлэрэ оҥоһулла сылдьаллар.
2025 сылга Дириҥ, Төлөй уонна Бахсы оскуолаларын эбийиэгэ былааҥҥа киирэн турар. Итиннэ улуус бүддьүөтүттэн бырайыактыыр-сметэлиир докумуоннарыгар 2 мөл 400 тыһ, экспертизэтигэр 1 мөл 250 тыһ көрүллүбүтэ.
Елена Макаринская