Алтынньы 24 күнүгэр Василий Сергеевич Соловьев – Болот-Боотур аатынан Хатылы орто оскуолатыгар 8-11 кылаас үөрэнээччилэригэр үгэскэ кубулуйбут «Мы в движении» коммунарскай сбор олус сэргэхтик ыытылынна.
Бу күн улуус биэс оскуолатыттан актыбыыс оҕолор муһуннулар. Ол курдук, тэрээһиҥҥэ Чурапчы гимназиятын, С.А. Новгородов уонна И.М. Павлов аатынан Чурапчы орто оскуолаларын итиэннэ Хатылы, Хадаар орто оскуолаларын үөрэнээччилэрэ кыттыыны ыллылар.
Тэрээһин үөрүүлээх аһыллыытыгар Хатылы оскуолатын дириэктэрин иитэр үлэҕэ солбуйааччы Софья Павловна оҕолору күһүҥҥү уһун өрөбүллэр саҕаламмыттарынан эҕэрдэлээтэ. Хамаандалар эрдэттэн бэлэмнээн кэлбит бэйэни билиһиннэрэр чаҕылхай нүөмэрдэрин көрдөрдүлэр. Сорохтор гитаранан ыллаатылар, сорохтор үҥкүүлээтилэр.
Тэрээһиҥҥэ ыҥырыылаах ыалдьыттар оҕолорго туһалаах маастар-кылаастары ыыттылар. Манна «Бастакылар хамсааһыннарын» бырайыактарын, араас күрэстэрин сырдаттылар. Ону таһынан Чурапчытааҕы волонтердар хамсааһыннарын уонна «Добро.ру» портал үлэтин билиһиннэрдилэр. Маны сэргэ үөрэххэ оҥоһуу өйү (ИИ) хайдах сөптөөхтүк уонна көдьүүстээхтик туһаныы туһунан кэпсээтилэр.
Салгыы саамай күүтүүлээх тэрээһин –ыстаансыйаларынан оонньуу саҕаланна. Оҕолор бэйэ-бэйэлэрин кытта түргэнник билсэллэрин уонна хамаанданан үлэлии үөрэнэллэрин туһугар сэрэбиэйинэн хамаандаҕа араардылар. Түһүмэхтэр ахсын өйү тургутар, түргэн туттунууну уонна болҕомтону эрэйэр араас сорудахтар күүттүлэр. Оҕолор манна кыахтарын, билиилэрин көрдөрдүлэр, биир киһи курдук үлэлээтилэр. Оонньуу түмүгүнэн элбэх баалы хомуйбут хамаанда кыайыылааҕынан таҕыста.
Тэрээһин туһунан кыттааччылартан санааларын билистибит.
Бэргэн Трофимов, С.А.Новгородов аатынан Чурапчы орто оскуолатын 11-с кылааһын үөрэнээччитэ:
— Олус интэриэһинэй тэрээһин буолла. Ордук ыстаансыйаларынан оонньууну сөбүлээтим. «Слепой строитель» түһүмэххэ өйгө тутан хаалбыт уруһуйбутун ыстакааннары ууран оҥордубут. Тэрийээччилэргэ улаханнык махтанабыт.
Санаайа Ноговицына, С.А.Новгородов аатынан Чурапчы орто оскуолатын 11-c кылааһын үөрэнээччитэ:
— Коммунарскай сборга хаһыс да сырыыбын кыттабын. Саҥа оҕолору кытта билсэн, доҕордоһон үөрдүм. Тэрийээччилэр интэриэһинэй оонньуулары толкуйдаабыттар. Ыстаансыйаларынан оонньуу кэмигэр икки этээһинэн сүүрэн, сэргэхсийэн, сүргэбит көтөҕүлүннэ. Дискотека эмиэ олус чаҕылхайдык ааста.
Маны таһынан Аан дойдутааҕы оскуола бибибилэтиэкэлэрин күнүгэр аналлаах «Ночь в библиотеке» декада чэрчитинэн истиҥ кэпсэтии тэрилиннэ. Оскуолабыт үлэһитэ Андрей Петрович уонна баҕалаах оҕолор хараҥа хоско уот умуруоран олорон, олоххо буолбут араас дьиктилэри, түбэлтэлэри кэпсэтэн, сэргэх киэһэни атаардыбыт.
Ити курдук, саҥа доҕоттордоннубут, хамаанданан үлэлииргэ үөрэннибит уонна уһун өрөбүллэрбит бастакы күнүн үөрэ-көтө, олус дуоһуйа сынньанан көрүстүбүт. Бу тэрээһин оскуолатааҕы кэмнэрбит биир умнуллубат түгэнинэн буолуоҕа.
Лиана Яковлева, Хатылы орто оскуолатын 10-с кылааһын үөрэнээччитэ.