Сахабыт сирин
Хаптал тэрилтэтэ
Төрдүс сылын
“Тыый!” чабырҕах!
Күөн күрэҕэр
Талба талааннары
Тэһии сүрэхтэри
Тыгыалас тымырдары
Тутан олорон
Тута-бааччы
Талан ыларга
Тэтимнээхтик тэрийдэ!
Күөх экран көрдөрөр
Кытыан тыл
Сытыы өй
Кимсиилээх күрэҕэр
Кыайыы иһин
Кылаан өйдөр
Кылбачыс гыннылар.
Ким төһө тылы
Өйгө тутан
Уһун тыыҥҥа
Түргэн тэтимҥэ
Тугу билбитин
Тугу сэргээбитин
Тугу сөхпүтүн
Тугу сирэрин
Тугу хайгыырын,
Киһиэхэ тиийэр гына
Ыраастык,ылбаҕайдык
Чуор куолаһынан
Чаҥыйар чабырҕах
Үөрэ-дьүөрэ тылынан
Чуо-бааччы
Чоргуйар эбитий
Чээ эрэ күрэххэ
Чулуулары талабыт
Чаҕаарыҥ! -диэтилэр
Дьэ доҕоттоор!
Чопчулуур күрэххэ
Чугастан чуорҕустулар
Ыраахтан ыксаластылар
Илин эҥэр улуустар
Иилэ-хабан
Иилистэ түстүлэр!
Киин улуустар
Кыайарга кылаан баҕа
Кимсэн кэллилэр.
Бүлүү бөлөх улуустар
“ Бээрэ хаайтарыы дуу!?”
Күһүҥҥү күнү-дьылы
Кэтии түһээтин
Кииҥҥэ ким олорор
Уҥа-хаҥас көрдүлэр
Тута-бааччы
Талааннарын токкоолоһон
Туймалдьытан турдулар.
Хотугу да улуустар
Хоһууннара хаалсыбата
Хотоойулаах санаатынан
Хорсуннук холонорго
Хонук сир көрдөннө
Харчытын ааҕынна
Аныгы ситим үйэтигэр
Сибээскэ таҕыста
Чыпчылыйыах түгэнэ
Бырайыас харчыта
Барбыта баар буолла,
Хонук сир төлөннө.
Айан ырааҕа
Ахсааҥҥа киирбэтэ
Аныгы көтөр аал
Аҕыйах чааһынан
Күпсүйэн кэлээтин
Аҕалан түһэрдэ
Абырал буолла!
Эрбии тииһин курдук
Эриэ-дэхси
Эрийсиилээх күрэххэ
Уруккаттан уран тылы
Умсугуйа баһылаабыт
Мэҥэлэр талааннара
Төрүт култуура
Уһулуччулаах уһуйааччылара
Ульяна Ефремова,
Кырбыһааҥкына Валентина
Суон сурахтаах Суолаттан
Биһирэнэр Бутэйдээхтэн
Ньургуйаана Прокопьева,
Талыы талба Тааттаттан
Айаал Быгынанов,кыргыттар
Чабырҕахсыт чулуулара
Аптарытыат ааттаахтара
Абытайдык айаараннар
Адьас тута абылаатылар!
Сураҕырбыт Сунтаартан
Кылбаҥ кыайыыны
Бастакы күрэххэ
Ылары ситиспит
Айталыына Крылова,
Көрөөччү биһирэбилэ
Анал ааты
Чурапчы Кытаанаҕыттан
Айталыына Понамарева
Үөрүү өрөгөйүн биллилэр.
Иккис күрэххэ
Айтал Бөнөкүүрэп,
Уол оҕо
Үс кырыылааҕа
“Күн дьөһөгөй
Үрдүк өрөгөй ”
Бэрдьигэстээх бэттэрэ
Бэртээхэйдик кыттаннар
Биһирэнэн бардылар..
Көрөөччү бирииһин
Томпо улууһуттан
Саргылана Дьяконова
Үөрэ-дьүөрэ тылы
Үөрэ-көтө туттан
Кымньыы кылыс тылы
Кыраҕытык кыбытан
Көрөөччүнү кэрэхсэтэн
Кыайыы кынаттанна.!.
Сырал күннээх Сылаҥтан
Ньургуйаана Бырдьакаанаба
Харса суох хааһахтан
Хостоон эрэр курдук
Хоһулаһыннара хоһуйан
Тэтимин түһэрбэккэ
Тэрбэччи көрөн,
Тырымначчы сандааран,
Субуруччу суккуйан,
Кылаан Чыпчаал бирииһи
Күлүмнэччи тутта.
Өйгө хатанан хаалбыттар
Күөх солко Ньурба
Көрүөхтэн кэрэ
Далбар хотуттара.
Байҕал тэҥэ
Баһаам балыктаах
Кэбээйи кэрэ куолара,
Быйаҥнаах буордаах Намтан
Эҥсиллэр эбэбит Өлүөнэ
Эҥсиэли хочотуттан
Элбэҕи үгүһү
Эҥсэн эттилэр
Күн күбэй ийэлэр!
Уус Алдан
Уран тыллаахтара
Суон сурахтаах Суоттулар
Соһуйуох быатыгар
Чабырҕахсыт эбээлэрин
Өйдөтөн бардылар.
Чабырҕах чаҕаан хонуутугар
Уолаттар даҕаны
Хомоҕой тылларынан
Холонон ыллылар.
Хоту Халыматтан
Үөрэх,култуура туйгуна
Дьэкиимэбэ Дьэбдьиэ
Чөллөркөй куолаһа
Чапчыйар айымньыта
Хоһуун хамсаныыта
Харахха хатанна!
Кыахтаахтык, күүстээхтик
Кыбыстыбакка киирсибит
Бэрдьигэстээх ньургуһуна
Саргыдаах санаалаах
Ньургуйаана Саввинова
Көрөөччү биһирэбилэ
Бириэмийэни тутан
Букатын дьоллонно!
Мырыла Амматын
Маанылаах сибэккитэ
Сардаана Федорова
Чулуу аакка тиксэн
Сүрэхтэрин сүүйдэ
“Тыый!” чабырҕах!
Көхтөөх күрэҕин
Көҕүлээбит, тэрийбит
Бары дьоһун дьоммутугар
Махтанабыт ис сүрэхтэн!
Чаҥыйар чабырҕахпыт
Күүтүүлээх биэрии буолла
Көрөөччүгэ биһирэннэ!
Төрөөбүт тылга
Төлөннөөх тапталы
Түөстэргэ иҥэрэн
Тылбытын билээччи
Тэнийэн иһиэхтин
Туругура туруохтун!
Сэҥээрэ