Дьокуускай куорат Хомсомуол аатынан болуоссатыгар сылын аайы ыытыллар «Атыы-эргиэн-2026» өрөспүүбүлүкэтээҕи агропромышленнай быыстапка-дьаарбанка балаҕан ыйын 25–27 күннэригэр XXVIII-с төгүлүн үрдүк тэрээһиннээхтик буолан ааста. Үс күн устата Сахабыт сирин бастыҥ фермердэрэ, тыа хаһаайыстыбатын бородууксуйатын оҥорон таһаарааччылара уонна агро-хайысхалаах оскуолалара түмүстүлэр. Бу тэрээһин атыы-тутуу эрэ былаһаакката буолбатах — манна уопут атастаһыыта, билиини хаҥатыы уонна саҥа соруктары туруоруу буолла. Уопсайа 115 кыттааччы бэйэтин үлэтин аҕалан көрдөрдө.
Быыстапка сүрүн соругунан өрөспүүбүлүкэ агропромышленнай эйгэтин сайдыытын ырытыы, кыһалҕалары быһаарыы, олохтоох оҥорон таһаарааччылары өйөөһүн уонна дьон сэргэҕэ сибиэһэй, хаачыстыбалаах аһы-үөлү тарҕатыы буолар. Дьаарбанкаҕа эти, балыгы, үүт аһы, оҕуруот уонна сир аһын, килиэби, ону тэнэ маҥнайгы умнаһы (хортуоппуйу) көрдөрдүлэр, атыылаатылар.
Кылаан кыайыылаахтар ааттаннылар
Балаҕан ыйын 27-гэр, Саха Өрөспүүбүлүкэтин судаарыстыбаннаһын күнүгэр, үөрүүлээх түмүк таҕыста. Саамай үрдүк наҕарааданы — Гран-при уонна «Саха Өрөспүүбүлүкэтин агропромышленнай комплексын бастыҥ аһылык оҥорон таһаарар тэрилтэтэ» диэн көһө сылдьар былааҕы Мэҥэ Хаҥалас Хоробутуттан сылдьар «Алаас-Ас» ТХПК (бэрэссэдээтэл Светоний Шестаков) ылла.
Улуустарынан уопсай мэтээл ахсаанынан көрдөрүү маннык буолла:
1-кы миэстэ: Дьокуускай куорат (16 мэтээл);
2-с миэстэ: Чурапчы улууһа (10 диплом);
3-с миэстэ: Мэҥэ-Хаҥалас улууһа (9 наҕараада).
Агро-оскуолалар куонкурустара: Төлөй — чөмпүйүөн!
Быыстапка чэрчитинэн ыытыллыбыт агро-хайысхалаах оскуолалар ортолоругар улахан куонкуруска 16 үөрэх кыһата кытынна. Биһиги улууспут киэн туттар оскуолата — Степан Тихонович Захаров аатын сүгэр Төлөй орто оскуолата (дириэктэр Андрей Деллохов) — бу күрэхтэһиигэ биир саамай чаҕылхай кыайыыны ситистэ.
Оскуола хамаандатын агро-хайысхатын салайааччыта Егор Самсонович Сивцев уонна методист Зоя Дмитриевна Дьячковская салайан илдьэ сырыттылар. Кинилэр «Бастыҥ оскуола фермата» диэн сүрүн номинацияҕа I степеннээх дипломунан наҕараадаланнылар.
Кыайыы чэпчэкитик кэлбэтэ. Оскуола учууталлара, үөрэнээччилэрэ, «Кустук» уһуйаан үлэһиттэрэ уонна нэһилиэк олохтоохторо бары биир санаанан турунан үлэлээтилэр. Кинилэр сууккаҕа тохтообокко үлэлиир сыахтарыгар 100-тэн тахса көрүҥ бородууксуйаны бэлэмнээбиттэр:
* Сибиэһэй ынах, убаһа этэ, бройлер куурусса;
* Эриллибит уонна буһарыллыбыт ынах иһэ;
* Эттэн 10 көрүҥ полуфабрикат уонна 37 көрүҥ бүлүүдэ;
* 30-тан тахса бурдук аһын арааһа;
* Бэйэ үүннэрбит оҕуруот аһыттан 20 көрүҥ барыанньа уонна кэнсиэрбэлэр.
Агро-хайысха методиһа Зоя Дмитриевна Дьячковская бэлиэтээбитинэн, бу ситиһии — оскуола эрэ кэлэктиибэ буолбакка, бүтүн нэһилиэк сомоҕолоһуутун түмүгэ. «Кыайыы иһин үлэҕэ оскуола үлэһиттэрин сэргэ Төлөйдөөҕү «Кустук» уһуйаан кэлэктиибэ, нэһилиэк олохтоохторо бары күүс-көмө буоллулар», — диэн эттэ.
Эҕэрдэлиибит!
Саха сирин араас улуустарыттан уонна Дьокуускай куораттан кыттыбыт 16 агрооскуола ортотугар биһиги оскуолабыт чиэһин көмүскээбит үөрэнээччилэрбитигэр — Марк Абрамовка (7 кылаас) уонна Айдын Хоютановка (8 кылаас) — «Питомник саженцев» агробырайыактарынан эмиэ ситиһиилээхтик кыттыбыттарын бэлиэтиибит. Кинилэр салайааччылара Чэмэлиинэ Михайловна Ксенофонтова уонна Мария Анатольевна Сивцева .
«Бастыҥ оскуола фермата» үрдүк ааты сүкпүт, кубоктаах уонна мэтээллээх миэстэҕэ тиксибит Төлөй орто оскуолатын коллективын, үөрэнээччилэрин уонна дириэктэр Андрей Васильевич Деллоховы итиитик-истиҥник эҕэрдэлиибит! Үлэҕит-хамнаскыт курдук, үүнэр сылларга үүнүүгүт-ситиһиигит үрдүү турдун!
Зоя Дьячковская, СӨ үөрэҕин туйгуна, Төлөй нэһилиэгин бочуоттаах олохтооҕо РФ үөрэҕириитин Бочуоттаах үлэһитэ, Төлөй орто оскуолатын агро хайысхатын методиһа
Бэлэмнээтэ Сэмэн ЖЕНДРИНСКЭЙ