Чурапчы улууһугар үгэскэ кубулуйбут «Ыччат баалыгар» сыл бастыҥнарын ааттаатылар.
Ол курдук, Соловьев нэһилиэгэ «Бастыҥ ыччат нэһилиэгэ» аат кыайыылааҕынан буолан, 50 тыһ. суумалаах сэртипикээтинэн наҕараадаланна. Быйыл Соловьев ыччаттара улуус, өрөспүүбүлүкэ ыытар дьаһалларыгар көхтөөхтүк кытыннылар. Улуустааҕы «Күөн күрэс» этническэй бэстибээлгэ 1-кы миэстэни ылары ситиһэн, өрөспүүбүлүкэҕэ улуус аатын чиэстээхтик көмүскээтилэр. Маны таһынан нэһилиэк ыччатын бииргэ түмэр, саха төрүт дьарыгын — булду тарҕатар туһугар нэһилиэктэригэр «Байанай күрэҕин» уонна ыччаты тыа сиригэр олохсутар сыалтан улуустааҕы «Тэйэр хайа-2023» ыччат бэстибээлин үрдүк таһымнаахтык тэрийдилэр. Ону тэҥэ үтүө санаа акцияларыгар, түөлбэлэригэр ыытыллар араас субуотунньуктарга кытыннылар. Волонтерскай хамсааһын тэриллэн, байыаннай дьайыы кыттыылаахтарын дьиэ кэргэттэригэр, аҕам саастаах дьоҥҥо көмөлөстүлэр, өр кэмҥэ ыраас иһэр уунан хааччыйдылар.
«Сыл бастыҥ патриота» — Чурапчытааҕы үнүстүүт 2-с кууруһун усутудьуона, байыаннай дьайыы бэтэрээнэ Тихон Тимофеев.
«Сыл бастыҥ волонтера« — Чурапчы гинмазиятын 10 «б» кылааһын үөрэнээччитэ, улуустааҕы Волонтердар кииннэрин биир көхтөөх чилиэнэ Дайаана Рожина.
«Бастыҥ бырайыак» — «Болтоҥо нэһилиэгин биллиилээх дьоно — Саҥарар планер» бырайыак, ааптар Диана Павлова. Бу планер-календарьга Болтоҥо нэһилиэгин чулуу дьонун үтүө ааттара, хаартыскалара киирдилэр. Маны сэргэ кылгас биографиялара, сүрүн үлэлэрэ видеонан оҥоһуллан, ютубка угуллан, кюар-коттара планерга киирдилэр. Бырайыак олоххо киириитигэр Болтоҥо оскуолатын үөрэнээччилэрэ үлэлэстилэр.
«Контентмейкер» — эдэр ийэ, Олохтоох көҕүлээһини сайыннарар агентство SMM-менеджерэ Евдокия Илларионова. Бу номинацияҕа кыттааччылар ирдэбил быһыытынан аныгы кэм ыччатын сүрүн санаатын тэттик видео нөҥүө тиэртилэр.
Номинация кыайыылаахтара үөрүүлээх быһыыга-майгыга бириэмийэлэрин кытта 10 тыһ. суумалаах сэртипикээттэри туттулар.
Улуус бастыҥ ыччаттарын үрдүк ситиһиилэринэн эҕэрдэлиибит!
Марфа Петрова
