Кулун тутар 15-16 күннэригэр, Дыгын оонньууларыгар сүүмэрдиир национальнай многобрьеҕа Саха сирин чөмпүйэнээтэ Чурапчы нэһилиэгэр буолуоҕа.
Чөмпүйэнээккэ бастыҥ көрдөрүүлээх түөрт бастыҥ ыспарсымыан аны сайын Туймаада ыһыаҕа ыытыллар Дыгын оонньууларыгар кыттар быраабы ылыаҕа.
Күрэхтэһии 70 киилэҕэ диэри уонна онтон үөһэ ыйааһыҥҥа эр дьоҥҥо, маны сэргэ дьахталларга ыытыллыаҕа. Чөмпүйэнээт Александр Федотов аатынан элбэх хайысхалаах успуорт уораҕайыгар уонна физкултуура, успуорт үнүстүүтүн баазатыгар ыытыллыахтара.
Ыспарсымыаннар национальнай ыстаныыларга, тутум эргииргэ, мас-рестлиҥҥа, оҕунан ытыыга, сүүрүүгэ, хапсаҕайга, ыараханы көтөҕүүгэ киирсиэхтэрэ. Хас биирдии көрүҥҥэ наҕараадаланыахтара.
“Чөмпүйүөннэргэ 50 тыһ.солкуобай, иккис миэстэҕэ 40 тыһ.солкуобай уооан үһүс миэстэҕэ 30 тыһ.солкуобай харчынан бириэмийэлэниэхтэрэ. Эр дьоҥҥо икки ыйааһыҥҥа итиэннэ дьахталлар, СӨ национальнай многоборьетын бэдэрээссийэтин салайааччы Алексей Пинигин аатыттан бириистэри тутуохтара”, — диэн бэдэрээссийэ дириэктэрин эбээһинэһин толорооччу Иван Белолюбскай биллэрдэ.
Дьэ, кимнээх кытталларый? Дыгын оонньууларын чаҕылхай сулустара Николай Матаннанов, Николай Обоев, Петр Прудецкий, Павел Друзьянов, Алексей Соколов о.д.а биллэр ыспарсымыаннар.
Санатан эттэххэ, бу соторутааҕыта Уус Алдан улууһугар ыытыллыбыт Дыгын оонньууларыгар сүүмэрдиир бастакы түһүмэх путевкаларыгар, Кубок хаһаайына Горнай улууһуттан Дьулустан Ноговицын, Кэбээйи улууһуттан Артем Дьяконов, Яков Дмитриев уонна Үөһээ Бүлүү улууһуттан Айсен Ботуев тиксибиттэрэ.
Быйылгыттан саҕалаан Саха сирин чөмпүйэнээтэ хамаанданан сыаналанар буолла. Ол эбэтэр сыл түмүгэр национальнай многоборьевҕа бастыҥ сүүмэрдэммит хамаандалаах улуустары быһаарыахтара.
Сэмэн Жендринскэй