Балаҕан ыйын үһүс өрөбүлүгэр ыытыллар «Нация кроһа» (Кросс наций) бүтүн Россиятааҕы сүүрүү күнүн көрсө, Саха норуодунай суруйааччыта Василий Яковлев-Далан аатынан Кытаанах орто оскуолатын үөрэнээччилэрэ сүүрүүгэ көхтөөхтүк кытыннылар.
Бу маассабай успуорт тэрээһинэ сыл аайы доруобай олоҕу сырдатар-тарҕатар, успуорка баҕалаах дьону, ордук эдэр көлүөнэни түмэр улахан суолталаах түһүлгэ буолар. Оскуола үөрэнээччилэрэ араас араҥанан, бэйэлэрин саастарыгар сөптөөх былаһааккаларга уонна былааннаммыт сирдэргэ күүстэрин боруобалаатылар.
Кыргыттар уонна уолаттар кыайыыга дьулуурдарын, кыайыгас-хотуугас буолалларын көрдөрдүлэр. Тэрээһин сүрүн сыалынан оҕолору физическэй култуураҕа сыһыарыы, доруобуйаны бөҕөргөтүү буолла.
Күрэхтэһии түмүгүнэн бастыҥ көрдөрүүлээх сүүрүктэргэ мэтээллэр, грамоталар туттарылыннылар.
Нэһилиэкпит бастыҥ ыспарсымыаннара 81 саастаах, сүүрүктэр, хайыһардьыттар, чөл олох пропагандистара Зинаида Семёновна Андреева уонна
Иван Петрович Игнатьев оҕолорго көхтөөхтүк кытта кэлбиттэрин, успуорду сэҥээрэллэрин иһин махталларын биллэрдилэр уонна инникитин да маннык тэрээһиннэргэ көхтөөхтүк кыттарга ыҥырдылар.
Ытык дьоммут күн-бүгүн сүүрүүнэн дьарыгыра сылдьалларынан, чэгиэн-чэбдик олох уонна уһун үйэлэнии чаҕылхай холобурдара буолалларынан олохтоохтор чахчы да киэн туттабыт.
Лена Пономарева, “Саҥа олох” хаһыат уопсастыбаннай кэрэспэдьиэнэ
Бэлэмнээтэ Сэмэн ЖЕНДРИНСКЭЙ