Кулун тутар 16 күнүгэр күн бастакы аҥарыгар СӨ Дьарыктаах буолуу киинин госкэмитиэтин бэрэссэдээтэлэ Светлана Горюшинская уонна СӨ Үөрэҕириитин, наукатын миниистирэ Нюргуна Соколова спикердээх аһаҕас кэпсэтии буолла. Манна кадр политикатын тула үгүс боппуруос ырытылынна.
Күнүс «Айылгыга» үлэ көрдөнөөччүлэргэ, үөрэххэ туттарсааччыларга киэҥ түһүлгэ тэрилиннэ. Манна «Полиметалл УК», «Нордголд», «Сахатранснефтегаз» курдук улахан тэрилтэлэр уо.д.а. кэлэн, вакансияларын, үлэлэрин билиһиннэрдилэр, дьон-сэргэ ыйытыыларыгар хоруйдаатылар, үлэ көрдүүр дьон миэстэтигэр резюмеларын биэрдилэр.
Маны таһынан үөрэнээччилэргэ анаан араас идэлэри көрдөрөр маастар-кылаастар, салайааччылары кытта аһаҕас кэпсэтии, «Точка роста» профессиональнай оонньуу, бизнеһи тэринээччилэргэ «Открой себя» маастар-кылаас тэрилиннэ. Улууспут оскуолаларыттан 300 кэриҥэ улахан кылаас үөрэнээччилэрэ кыттыыны ыллылар, инники идэлэрин талалларыгар олук уурар улахан тэрээһинтэн астынан тарҕастылар.
Салгыы экспедиция Таатта, Томпо, Өймөкөөн улуустарыгар үлэлиэҕэ.
Елена Макаринская
Наталья Сибирякова видеота