Олунньу 12-14 күннэригэр Чурапчыга СӨ ситэриилээх былааһын 2023 сыллааҕы үлэтин отчуота 3 бөлөҕүнэн бары нэһилиэктэри хабан ыытылынна. Бүгүн СӨ Тутуу миниистирин бастакы солбуйааччыта Евгений Афанасьев салайааччылаах үһүс бөлөх сарсыарда 10 чаастан Мырылаҕа үлэлээтэ.
Евгений Егорович Бырабыыталыстыба ааспыт сылга ыыппыт сүрүн үлэтин-хамнаһын сиһилии билиһиннэрдэ.
Соловьев нэһилиэгин олохтоохторо СӨ Тыа хаһаайыстыбатын министиэристибэтин бэрэстэбиитэлэ тоҕо суоҕун, сүөһү, сылгы ахсаанын элбэтэргэ ханнык кэскиллээх бырагыраамалар баалларын, сылгы төбөтүгэр бэриллэр көмө туһунан туоһуластылар.
Этиилэргэ саҥа арыы оҥорор сыаҕы туруорустулар. Август карьер үлэтин сөргүтэр наадатын эттилэр. Мырыланан атын нэһилиэктэргэ быһалыы ааһар суолу өрөспүүбүлүкэ таһымнаах оҥорорго туруорустулар. Тэйиччи сытар нэһилиэккэ баһаарынай депо аһылларыгар үлэлэһэргэ ыҥырдылар.
«Меркурий» сыһыарыыга дааннай киллэрэргэ, Госуслуги уонна үөрэх порталларын туһанарга төлөпүөн сибээһэ мөлтөҕүттэн араас күчүмэҕэйдэр үөскүүллэрин эттилэр. Онон сибээһи тупсарарга көрдөстүлэр.
Хочуолунай кыамтата кыайарынан хаалбыт ыаллары киинтэн ититии ситимигэр холбуулларыгар баҕараллар. Ыраах сытар нэһилиэккэ суол-иис ыараханынан күнүскү куойкалаах саҥа амбулатория тутуутун туруорустулар.
Олохтоох бэйэни салайыныы реформатын туһунан итиэннэ тыа сирин сайыннарыыга ыччат олохсуйуутун ситиһэргэ туох соруктар туралларын ыйыттылар. Маны сэргэ педагогтар хамнастарын үрдэтэргэ туруорустулар. Тыа хаһаайыстыбатыгар каадыр боппуруоһун быһаарарга, кэлии исписэлиистэри дьиэнэн хааччыйарга анал бырагырааманы олохтуурга көрдөстүлэр.
Маны таһынан нэһилиэнньэ чөл туруктаах буоларыгар, этин-сиинин сайыннарарыгар саҥа спортивнай саал тутуутун туруорустулар.
Мунньах кэмигэр олохтоохтор Бырабыыталыстыба отчуота сыл аайы табыгаһа суох бириэмэҕэ буоларын бэлиэтээтилэр. Куоластааһыҥҥа СӨ ситэриилээх былааһын 2023 сыллаах үлэтин сөптөөҕүнэн сыаналаатылар.
Марфа Петрова.
