Бүгүн, ахсынньы 22 күнүгэр, улууспут нэһилиэктэрин 2010-2012 уонна 2013-2015 сыллааҕы төрүөх уолаттар икки ардыларыгар сахалыы төрүт көрүҥнэргэ аан бастакытын ыытыллар Оонньуулар үөрүүлээх арыллыыта буолла.
Борбуйдарын саҥардыы көтөҕөн эрэр уолаттарга анаан улуус дьаһалтатын успуорка управлениетын начаалынньыга Дьулустан Егоров, улуус үөрэххэ салаатын начаалынньыга Юрий Посельскай быһаччы өйөбүллэринэн, Кытаанах нэһилиэгин Аҕа баһылыга Егор Потапов өй-санаа уган, үүнэн иһэр ыччаттар ортолоругар успуорт көрүҥүн тэнитэр сыалтан итиэннэ улаатан эрэр уолаттар бэйэлэрин кыахтарын тургутан көрөллөрүгэр анаан тэрилиннэ.
Василий Яковлев аатынан Кытаанах орто оскуолатын ыспартыыбынай салаатыгар Арыылаах, Кытаанах, Сылаҥ, Соловьев, Болтоҥо, Болугур нэһилиэктэрин, Улахан Күөл учаастагыттан 48 кыттааччы муһунна. Уолаттар уопсайа холбоон биэс көрүҥҥэ о.э сахалыы ыстаҥаҕа, мас тардыһыытыгар, сүүрүүгэ, мүһэ былдьаһыытыгар уонна хапсаҕайга күөн көрсүөхтэрэ. Ыстаҥаҕа номнуо кыайыылаахтар ааттара билиннэ, күрэхтэһии салҕанан барар.
Кыайыылаахтар мэтээллэринэн, сыаналаах бириистэринэн наҕараадаланыахтара.
Сэмэн Жендринскэй