Кытаанах нэһилиэгэр, бүгүн үөрүүлээх күн үүннэ! Саха сирин, Арассыыйа уонна Аан дойду успуордун устуоруйатыгар чаҕылхай кылааты киллэрбит, көҥүл тустууга ССРС, РСФСР, САССР успуордун үтүөлээх тириэньэрэ Дмитрий Петрович Коркин төрөөбүтэ 98 сылынан үөрүүлээх тэрээһиннэр ыытылынна.
Төрөөбүт алааһыгар буолбут үөрүүлээх чааска оскуола үөрэнээччилэрэ, нэһилиэк олохтоохторо, тэрилтэлэр салайааччылара, “Чурапчы улууһа” МО баһылыгын социальнай боппуруостарга солбуйааччы Мария Филипповна Кронникова, улуус дьаһалататын успуорка управлениетын начаалынньыга Дьулустаан Егоров салайааччылаах дэлэгээссийэ кэлэн, мустан, алаадьынан, кымыһынан, саламаатынан биэнсийэлээхтэр айах тутууларынан (бэр. Любовь Монгуш) Улуу тириэньэри ахтан-санаан аастылар.
Тэрээһин биир сүрүн хамсааһынынан “Старт празднованию к 100-летию” бэлэһипиэттээх айан (велопробег) буолла. Бу дьаһал — Улуу Куоркуммут төрөөбүтэ 100 сылын туолуор диэри ыытыллыахтаах далааһыннаах хамсааһын бастакы хардыыта. «Старт празднованию к столетию Дмитрия Петрович Коркина» велопробег кыттыылаахтарыгар, РФ худуоһунньуктарын Сойууһун чилиэнэ, биир дойдулаахпыт Кыыдаана Игнатьева оҥорбут дьаралыга футболкаҕа түһэриллибитин бэлэх быһыытынан барда.
Бэлэһипиэтинэн сүүрүүгэ кыттыбыт эдэр ыспарсымыаннарп уонна тэрилтэ бэрэстэбиитэллэрэ удьуор утум салҕанарын, тириэньэр идиэйэлэрэ тыыннаахтарын туоһулаатылар.
Үөрүүлээх күҥҥэ өссө биир устуоруйа суолталаах түгэн тосхойдо. Дмитрий Коркин сырдык аатын, кини сыралаах үлэтин үйэтитэр сыаллаах-соруктаах, төрөөбүт алааһыгар балаҕан тутуутугар анал пуонда үлэтин, Кытаанах сириттэн саҕалаата. Бу бырайыак норуот сомоҕолоһуутун бэлиэтинэн буолар.
Пуонда өйөөччүлэрин испииһэгин номнуо биллиилээх бөҕөс, Дмитрий Петрович иитиллээччитэ, ССРС спордун көӈүл тустууга маастара, Сойууска ыччакка 5-с миэстэлээх Афанасий Захаров бастакынан үбүнэн көмөтүн киллэрэн, үйэтитии үлэтигэр үтүө холобуру көрдөрдө.
«Дмитрий Петрович биһигини соҕотох тустууга эрэ буолбакка, киһи быһыытынан чиҥник ииппитэ. Кини эппит тыллара, эрчийбит методикалара билигин даҕаны биһиги сүрэхпитигэр бааллар. Алааһыгар балаҕан тутуллара — бу киниэхэ, кини үөрэнээччилэригэр уонна бүтүн саха норуотугар сүгүрүйүү бэлиэтэ», — диэн Афанасий Захаров санаатын үллэһиннэ.
Билигин пуонда үлэтэ күргүөмнээхтик барарыгар араас элбэх хамсааһыннар барыахтаахтарын Мария Филипповна тэрээһин кыттыылаахтарын эҕэрдэлээн туран билиһиннэрдэ. Бу эбийиэк Коркин аатын сүгэр көҥүл тустуу академиятын утумнаах үлэтин, саха успуордун духуобунай киинин быһыытынан эрэ буолбакка, туризм сайдыытын тирэҕинэн эмиэ буолуоҕа. Манна кэлбит ыалдьыттар саха култууратын, успуордун устуоруйатын кытта билсиэхтэрэ. Бу бырайыагы өйөөһүн — инники көлүөнэни патриотизм тыыныгар иитиигэ улахан төһүү күүс буолуоҕа.
Бу курдук, Дмитрий Коркин төрөөбүтэ 98 сылыгар анаммыт күн кини аата умнуллубатын, оттон кини үөрэппит-такайбыт олимпиецтара, чөмпүйүөннэрэ — саха норуотун киэн туттуута буолалларын итэҕэтиилээхтик көрдөрдө. Итинник далааһыннаах бэлэһипиэтинэн сүүрүүлэр уонна мемориальнай эбийиэктэр тутуулара 2026–2028 сылларга тириэньэр 100 сылын бэлиэтиир үбүлүөйдээх дьаһаллар тумус тутуллар хайысхалара буолуохтара.
Дмитрий Коркин бүүһүгэр сибэкки дьөрбөтүн кини иитиллээччитэ, баһылыкпыт Иван Пономарев, убаастабыллаах ыалдьыттарбытын тэӈэ оскуолабыт бэрэсидьиэнэ Арылхан Пономарев уурсубута эмиэ сонун көстүү буолла. Бу буоллаҕа үүнэр көлүөнэҕэ дьоммут үтүө ааттарын өрө тутан инники күөӈӈэ тутан үйэтитэрбит.
Лена Пономарева
“Саӈа олох” хаһыат уопсастыбаннай кэрэспэдьиэнэ
Бэлэмнээтэ Сэмэн ЖЕНДРИНСКЭЙ