Чурапчы нэһилиэгин «Куоҕалы» түөлбэтин олохтоохторугар уонна нэһилиэк эдэр ыспарсымыаннарыгар үөрүүлээх, биир долгутуулаах күн буолла. Улуустааҕы гимназия успуорт былаһааккатыгар оскуола үөрэнээччилэригэр аналлаах футбол турнира иккис сылын субуруччу ыытыллан, кырачаан футболистарга дьиҥнээх бырааһынньыгы бэлэхтээтэ.
Бу күн Куоҕалы киэҥ түөлбэтэ чугдаархай свисток тыаһынан, футболунан туолла.
Барыта холбоон 8 хамаанда күөн көрүстүлэр: түөлбэ көхтөөхтүк үлэлиир «Спортивнай» ТОС хамаандата, Буойуна алааһын эрчимнээх уолаттара, Арҕаалар, Илиннэр, ону тэҥэ сүрүн хаһаайыннар — гимназия үөрэнээччилэрэ уонна ДЮСШ бастыҥ иитиллээччилэрэ. Хамаандалар бары ох курдук оҥостубут, бэлэмнээх кэлбиттэрэ харахха быраҕыллар.
Тэрээһин саамай ытыктанар киһитинэн турнир төрүттээччитэ, Чурапчыбыт биллэр-көстөр киһитэ Жанна Аргунова буолар. Кини уруккута оройуон кондитерскай сыаҕын сатабыллаах салайааччыта, билигин бочуоттаах сынньалаҥҥа да сырыттар, уопсастыбаннай олохтон туора турбат.
— Оҕолорбут эт-хаан өттүнэн сайдыылаах, чөл туруктаах, кыайыыга дьулуурдаах буоллуннар диэммит, бу күрэхтэһиини иккис сылбытын тэрийдибит. Маны таһынан, мин бэйэм уолбун эмиэ успуорка угуйа, кинини кытта бииргэ хамсана сылдьар баҕаттан маннык дьаһаллары ыытабын. Ким даҕаны бириистэн матыа суоҕа, кыайыылаахтар бириэмийэлэниэхтэрэ. Түгэнинэн туһанан сүрүн судьуйаларбыфыгар, тириэньэрбитигэр ини-бии Петр уонна Роберт Саввинарга дириҥ махталбын тириэрдэбин. Роберт Анатольевич биһиэхэ иккис сылын субуруччу судьуйалаата оттон Петр Анатольевич арҕаа түөлбэ оҕолоругар тириэньэринэн үлэлиир”, — диэн санаатын Жанна Дмитриевна үллэһиннэ.
Быйылгы турнир тас дойдуларга буолан ааспыт улахан футбол чөмпүйэнээтин кытары судургутук сөп түбэспитэ мээнэҕэ буолбатах. Аан дойдуну аймаабыт голлар, сенсационнай кыайыылар уонна чаҕылхай финтовтар долгуннара биһиги түөлбэбитигэр кытары кэлэн ааста. Ол курдук, оонньуулар усталарыгар футболистар Европа уонна Америка сүүмэрдэммит хамаандаларын маастардастыбаларын үтүктэн, араас албаһы тутталлара, хардары-таары атаакалыыллара көрөөччүлэр болҕомтолорун тарта. Манна ким да хотторууну билиммэт өстөөх буолбакка, успуорт аргыстаах доҕор буоларын өссө төгүл итэҕэттилэр. Хас биирдии атахха тэбии, пас уонна гол — бу барыта оҕолорго улахан футбол алыптаах эйгэтин кытары быһаччы ситимнээҕин санатар.
Түөлбэ олохтоохторо бу күн эмиэ туора турбатылар. Ким эрэ судьуйалаата, сорохтор ыалдьааччы быһыытынан хаһыытаан-ыһыытаан уолаттары өйөөтүлэр, атыттар ас-үөл бэлэмнээн, тымныы уу кутан, кыра футболистарга күүс-уох биэрдилэр. Маннык сомоҕолоһуулаах, биир тыыннаах ыспартыыбынай бырааһынньыктар — түөлбэ социальнай ситимнэринэн эрэ буолбакка, илэ алтыһыытынан, эт илиинэн тутуспутунан сайдарын кэрэһитэ. Олохтоох дьаһалта уонна успуорт инструктордара эмиэ көх-нэм буолан, тэрээһин хаамыыта хайдах да күн-дьыл турдар, тохтоло суох барда.
Күрэхтэһии түмүгүнэн кыайыылаахтар наҕараадаланнылар, мэтээллэри кэттилэр. Ол курдук, уопсай түмүккэ улахан саастаах уолаттарга:
1 миэстэ – Степан Макаров аатынан Чурапчы гимназиятын сүүмэрдэммит хамаандата;
2 миэстэ – Арҕаа бас түөлбэтэ;
3 миэстэ – ДЮСШ сүүмэрдэммит хамаандата.
Кыра саастаах уолаттарга:
1 миэстэ – Илин бас түөлбэтэ;
2 миэстэ – Арҕаа бас түөлбэтэ;
3 миэстэ – “Спортивнай” ТОС.
Ол эрээри, успуорка саамай сүрүнэ — кыайыы-хотуу буолбакка, доҕордоһуу уонна доруобуйа чиҥ буоларын бу күн өссө төгүл чиҥэттэ. Икки сыл устата ыытыллыбыт турнир номнуо үтүө үгэскэ кубулуйан, Чурапчы нэһилиэгин оҕолоро сайын ахсын футбол толбонноох былаһааккатыгар көрсөр кэскиллээх былааннара баар буолла. Көрөөччүлэр бүгүҥҥү оонньууну өргө диэри умнубакка өйдүү-саныы сылдьыахтара, оттон кыттааччылар номнуо сарсыҥҥы кыайыыга былааннары оҥостуохтара турдаҕа. Салгыы бу курдук түмсүүлээх үлэ салҕанарыгар, кэлэр сылга өссө элбэх хамаанда кыттарыгар эрэл улахан.
Сэмэн ЖЕНДРИНСКЭЙ