Бу күннэргэ, остуол тиэниһин көрүҥэр Арассыыйаттан бастыҥ ыспарсымыаннар тоҕуоруһа мустубут “ТОП-24” түһүлгэлэрэ тэрилиннэ.
Манна биһиги улууспут биир саамай күөн туттар ыччата, Хатылылар уоллара, билигин Москуба куоракка 1-кы нүөмэрдээх Олимпийскэй резервэ училищетын иитиллээччитэ Изот Кривошапкин, 16-20 саастаах тиэньисчиттэр ортолоругар үрүҥ көмүс мэтээли ылары ситистэ. Бу Саха сирин успуордун устуоруйатыгар букатыннаахтыы киирэр улахан ситиһии буолар. Бу көрсүһүүгэ Изот – 14-тэн 13-н кыайар, түмүккэ Самара куоратыттан сылдьар Павел Киселевы кытары очкуолара тэҥнэһэн хаалар, онуоха Киселев эрдэ кыайбытынан сибээстээн сүрүн судьуйа кыайыыны Самара тиэньисчитигэр суруйар.
Түмүккэ, 1 миэстэ — Павел Киселев, 2 миэстэ – Изот Кривошапкин, 3 миэстэ – Игорь Гордин буоллулар.
Инньэ диэн туран, уолбутун сахалартан бастакы үрдүк ситиһиитинэн эҕэрдэлиэҕин, өссө даҕаны Саха сирин, Чурапчы улууһун ааттата турдун. Сүрүн тириэньэригэр, Изот төрөппүт аҕатыгар Геннадий Кривошапкиҥҥа улахан эҕэрдэбитин тириэрдэбит!
Сэмэн Жендринскэй