Соловьев сельсэбиэтин дьокутааттарын 71 бырыһыаннара ыанньыксыттарынан, ыччат сүөһүнү көрөөччүлэринэн, сүөһү иитиитин араас үлэлэригэр сылдьаллара. Производство бу салаатыгар отделениеҕа баһылыыр-көһүлүүр оруолу ылаллара.
1975 сыллааҕы кыстыкка уопсастыбаннай сүөһүлэр турар хотонноругар барыларыгар Сэбиэт дьокутааттара фермалар старшайдарынан, настаабынньыктарынан эбэтэр агитатордарынан ананан үлэлээбиттэрэ. Кинилэр тохсус пятилетка бүтэһиктээх сылыгар бэйэлэрин тустаах үлэлэригэр үчүгэй түмүктэри ситиспиттэрэ.
Уопсастыбаннай сүөһү аһылыгын бэлэмнээһиҥҥэ дьокутаат, тыа хаһаайыстыбатын бастайааннай хамыыһыйатын бэрэссэдээтэлэ И.И. Сергеев механизированнай звенота ылыммыт эбээтэлистибэтин толорон 10700 центнер бастыҥ суортаах оту оттоон сүөһү үлэһиттэригэр туттарбыта. Онтон салгыы Сергеев кормозапарниктары хотонтон арааран тутуу үлэтин салайан ыыппыта.
Үлэ Кыһыл Знамята уордьан кавалера, Саха АСССР Үрдүкү Сэбиэтин дьокутаата А.И. Собакина ыччат сүөһүнү иитэр “Тэйэр” ферматын старшайынан хас да сыл үлэлээбитэ. 1975 сыллааҕы кыстык бастакы ыйыгар 332 бороон ыйдааҕы эбиллиилэрин хас биирдии төбө 19 киилэни ситиһэн, ылыммыт эбэһээтэлистибэлэрин толорууга тэтимнээх хардыылары оҥорбуттара.
Отделениеҕа пятилеткатааҕы тус былааннарын 4 ыанньыксыт толорбутуттан үһэ нэһилиэк Сэбиэтин дьокутаттара этилэрэ. Дьокутааттар А.Л. Сергеева, Е.Н. Кронникова ыччат настаабынньыктарынан хас да сыл үлэлээбиттэрэ, эдэр ыанньыксыттары үөрэтиигэ, иитиигэ үгүс сыраларын биэрбиттэрэ. Кинилэр тустаах пятилеткаларын толорбуттара. 1975 сыл уон ыйын түмүгүнэн иккиэгн хас биирдии ынахтарыттан иккилии тыһыынчаттан тахса киилэ үүтү ыабыттара. Дьокутаат Евдокия Николаева ыччат сүөһүнү кыһыҥҥы төлөһөтүүгэ тустаах пятилеткатын 1975 сыл иһинэн толорор кыахтаммыта. Кини ити сыл бастакы ыйыгар эбэһээтэлистибэтин куоһаран турардаах.
Эдэр ыанньыксыт, сельсэбиэт дьокутаата Мария Федосеева эдэр ыанньыксыттар оройуоннааҕы куоталаһыыларыгар бастаан хомсомуол уобаластааҕы кэмитиэтин путевкатынан сайын Германия Демократическай Өрөспүүбүлүкэтигэр туристаабыта. Дьокутааттар Елена Хомподоева, Анастасия Седалищева үүт ыаһыныгар 10 ыйдаах сорудахтарын аһара толорбуттара.
Ити курдук, Сэбиэт дьокутааттара үлэ араас салааларыгар аттарыллан туруоруллубут миэстэлэригэр үтүө холобуру көрдөрөн нэһилиэнньэ киэҥ ытыктабылынан туһаналлара, бары ыытыллар уопсастыбаннай үлэлэргэ көхтөөхтүк кытталлара, быыбардааччыларын үрдүк итэҕэллэрин чиэстээхтик толороллоро.
Сэмэн Жендринскэй