1976 сыллаахха Монреаль куоракка буолбут олимпийскай оонньууларга Улуу тириэньэр иитиллээччилэрэ, чулуу тустууктарбыт Роман Дмитриев, Павел Пинигин уонна Александр Иванов үрдүк пъедесталга тахсыбыттара.
Бүгүн кинилэргэ анаан, Чурапчы дьоно-сэргэтэ үөрүүлээх бырааһынньыгы тэрийдилэр. Бырааһынньык Улуу тириэньэр Дмитрий Петрович Коркин аатынан Албан аат музейыгар, кини тэлгэһэтигэр ыытыллыбыта сиэри ситэрэн, суолталаан биэрдэ.
Чыпчааллары дабайбыт дьоруойдарбыт Павел Пинигин, Александр Иванов кэргэнинээн Варваралыын уонна Дмитрий Петрович Коркин олоҕун аргыһа Александра Семеновна кыыһынаан Гея Дмитриевналыын күндү ыалдьыт буоллулар. Кинилэри эҕэрдэлии бииргэ үөрэммиттэрэ, үөлээннээхтэрэ, улуус салалтата, ЧРОСИО, ЧГИФКСИ салалтата, нэһилиэктэр баһылыктара, спорду сэҥээрээччилэр, спортсменнар уонна инники кэскиллэрбит – тустуук уолаттар муһуннулар.
Бу күнү суолталаан, ытыктаан, Өрөгөй сэргэтэ туруорулунна. Сэргэни норуот маастара Вячеслав Барашков оҥордо. Маанылаах сэргэ турбутуттан олимпийскай чемпионнар олуһун үөрдүлэр, астыннылар.
Павел Павлович: “50 сыл аннараа өттүгэр чемпионнаан кэлбиппэр, дойдубар Дириҥҥэ сэргэ туруорбуттара билигин даҕаны турар. Онтон бу бүгүн турбут олус кыраһыабай, улахан көстүүлээх сэргэбит ытыктыыр тириэньэрбит Бөтүрүөбүс тиэргэнигэр турда, онон өссө да уһуннук, үйэлээхтик туруо, инникитин олимпийскай чемпион кэлэр кэрэһитэ буоллун.
Соторутааҕыта 50 сыл аннараа өттүгэр олимпиадаҕа кыттыбыт Монреаль куораппар баран кэллим. Олорбут уопсайбыт уларыйбыт, дьиэ буолан атыыламмыттар. Стадион кытыытыгар турар стелаҕа суруллубут аатым билигин да кылабачыйа оонньуу турарын көрөн соһуйдум. Онтукам Монреальга олорор сахалар кэлэн сото, ыраастыы сылдьаллар эбит. Ити курдук биһиги сахалар ханна да буолларбыт, бэйэ-бэйэбитин ытыктаһа, өйөһө-өйөнсө сылдьарбытыттан киһи үөрэр.
Инникитин олимпийскай чемпион кэлэригэр мин саарбахтаабаппын”, — диэн эттэ.
Оттон Александр Николаевич: “Олимпиадаҕа тиийэр диэн судургу буолбатах, араас мэһэйдэри, үгүһү туораан тиийэҕин. Онно барытыгар күүстээх санаа, тулуур, дьулуур наада. Биһиги оччолорго биир тириэньэр иитиллээччилэрэ тиийэн, үһүөн тутуспутунан сылдьыбыппыт. Роман биһикки үрүҥ көмүһү ылан баран, Павелга эрэлбит эйиэхэ, дойдубутугар хайаан да кыһыл көмүс мэтээллээх тиийиэхтээхпит диэн күүһүгэр күүс эппиппит. Ол баҕа санаабыт туолан, сахабыт норуотун үөрдүбүппүт. Онон бу өрөгөйбүт бүтүн Сахабыт сирин кыайыыта буолар. Билигин даҕаны чемпиону кэтэһэбит, чемпион тахса илигиттэн хомойобут, ол да буоллар эрэллээхпит», — диэтэ.
Үөрүүлээх түгэнинэн эҕэрдэлээн туран, улуус баһылыга Степан Саргыдаев уонна улуус дьокутааттарын Сэбиэтин бэрэссэдээтэлэ Яков Оконешников Павел Пинигиҥҥэ, Александр Ивановка уонна Александра Семеновнаҕа 50 тыһ солк сэртипикээттэри туттардылар. Маны сэргэ Василий Гоголевы “Оройуонун иннигэр үтүөлэрин иһин” 2-с истиэпэннээх бэлиэнэн, Семен Пинигини “Чурапчы улууһун бочуоттаах бэтэрээнэ” бэлиэнэн наҕараадалаатылар.
Эҕэрдэлии кэлбиттэр бука бары истиҥ тылларын, күндү бэлэхтэрин анаатылар.
***
Сахабыт сиригэр улуу олимпийскай үгэстэр сүппэттэр, көлүөнэттэн көлүөнэҕэ бэриллэн, эдэр бөҕөстөрбүтүн саҥа чыпчаалларга сирдииллэр диэн туран, бу бэлиэ даатаҕа бэлэх оҥорбут Арассыыйа чемпионатыгар боруонса мэтээли ылары ситиспит биир дойдулаахпытын Константин Капрынову чиэстээтилэр.
Улуус баһылыга Степан Саргыдаев уонна улуус дьокутааттарын Сэбиэтин бэрэссэдээтэлэ Яков Оконешников эҕэрдэлээн туран, Константиҥҥа “Оройуонун иннигэр үтүөлэрин иһин” 2-с истиэпэннээх бэлиэни кытта 200 тыһ солк сэртипикээти бэлэх ууннулар. Кини тириэньэригэр Егор Пономаревка “Оройуонун иннигэр үтүөлэрин иһин” 2-с истиэпэннээх бэлиэни кытта 50 тыһ солк сэртипикээти туттардылар.
Маны тэҥэ нэһилиэктэр баһылыктара, Оҕо спортивнай оскуолатын дириэктэрэ Александр Неустроев, кини убайа Данил Неустроев, спортсменнар, спорду көҕүлээччилэр, фанаттар бэйэлэрин бэлэхтэрин, баҕа санааларын анаатылар.
Елена Макаринская
Сэмэн ЖЕНДРИНСКЭЙ хаартыскаҕа түһэриилэрэ