Бүгүн «Оһуохайдаан ойуохха, эһиэкэйдээн тэйиэххэ» өрөспүүбүлүкэтээҕи оһуохай күрэһин улуустааҕы сүүмэрдиир түһүмэҕэ оскуола оҕолоругар А.П.Гоголев аатынан Чурапчытааҕы оҕо урамньы оскуолатыгар ыытылынна. Дьүүллүүр сүбэ кыттааччылары 7-12, 13-17 саастарынан икки бөлөххө арааран сыаналаата. Күөн күрэс улуустааҕы Олоҥхо киинин тэрийиитинэн буолла.
Алаҕар, Төлөй, Болтоҥо, Хатылы, Хайахсыт, Чурапчы оскуолаларыттан оһуохай таһаарааччылар ох курдук оҥостон, кустук курдук куоһанан, саха төрүт таҥаһын таҥнан-симэнэн көҥүл тиэмэҕэ оһуохайдаан кытыннылар.
Түмүккэ 7-12 саастаахтарга Хайахсыттан Тимур Колесов (салайааччы Д.К.Кузьмина) үһүс, Алаҕартан Влада Габышева (салайааччы Е.Н.Тотонова) иккис буоллулар, Хатылыттан Артем Лебедкин (салайааччы К.М.Козлова) кыайыылааҕынан таҕыста. 13-17 саастаах оҕолорго Алаҕартан Арылхан Крюков (салайааччы Е.Н.Тотонова) үһүс, Төлөйтөн Айыына Алексеева иккис, Айдын Хоютанов (салайааччы Е.Е.Попова) кыайыылаах буолары ситистилэр. Бу оҕолор ахсынньы ыйга Дьокуускайга ыытыллар өрөспүүбүлүкэтээҕи күрэххэ кытта барыахтара.
Наталья Сибирякова, ааптар хаартыскалара, видеота