Муус устар 1 күнүгэр И.Винокуров аатынан «Айылгы» норуот айымньытын дьиэтигэр уран тарбахтаахтар, көмүс илиилээхтэр, норуот маастардарын форумнара ыытылынна. Тэрээһини «Ай» норуодунай студия салайааччыта Айылгы Пинигина иилээн-саҕалаан ыытта. Манна маастардары таһынан нэһилиэк кулууптарын дириэктэрдэрэ, уус-уран салайааччылара муһуннулар.
Бэлиэтээн эттэххэ, быйыл биллэриллибит өрөспүүбүлүкэҕэ култуура, улууспутугар бэйэ оҥорон таһаарыытын сыла аҥардас тыа хаһаайыстыбатын үлэһиттэригэр, урбаанньыттарга эрэ буолбакка норуот маастардарыгар эмиэ быһаччы сыһыаннаах. Кинилэр саха төрүт үгэстэрин иҥэринэн сылдьар, илиилэрин сылааһынан, сатабылларынан араас оҥоһуктары айан-тутан, оҥорон таһаарар чулуу дьоммут буолаллар. Онон быйыл улууспутугар маастардар ассоциациялара тэриллибитэ тоҕоостоох. Ассоциация салайааччытынан Таисия Брызгаева ананан, кэнсиэпсийэтэ оҥоһуллан дьэ үлэтин саҕалаан эрэр. Бу форумҥа ол туһунан информацияны култуура управлениетын начаалынньыгын солбуйааччыта Сусанна Дьячковская билиһиннэрдэ. Кэнсиэпсийэҕэ 2026-2028 сылларга үлэ торума былааннанан киирбит. Холобур, быйыл ыам ыйыгар ыыттыллыахтаах «Сайын fest» биир улахан былаһааккатынан маастардар киэнэ буолара күүтүллэр. Онно хас биирдии нэһилиэк уран тарбахтаахтара бэйэлэрин араас матырыйаалтан сувенирнай оҥоһуктарын аҕалан туруоруохтара, ону анал хамыыһыйа көрөн, бастыҥнары талан, улууспут «Чурапчыттан чочуллан..» бренд оҥоһуга буолуохтаах. Ол эбэтэр бу талыллыбыт оҥоһуктар элбэх ахсаанынан оҥоһуллан, саҥа «Кытыл» эко-пааркаҕа атыыланар кыахтаныахтара, атын сиртэн Чурапчыбытын көрө-истэ кэлбит дьоҥҥо, ыалдьыттарга өйдөбүнньүк бэлэх буоларга туттуллуохтара. «Нэһилиэктэр уран тарбахтаах, талааннаах дьоҥҥутун, маастардаргытын ааттарын-суолларын, дьарыктарын, ситиһиилэрин сурукка киллэриҥ. Холобур, аҕыйах сыллааҕыта оҥоһуллубут испииһэгинэн 480-тан тахса дьон баара, билигин бу маастардарбыт кэккэлэрэ хаҥаабыта саарбаҕа суох»,—диэн Сусанна Дмитриевна тоһоҕолоото.
Өссө биир бэлиэ түгэнинэн кини 2027 сылга буолуохтаах «Ай» норуодунай студия 60 сыллаах үбүлүөйэ буоларын бэлиэтээтэ. Бу чэрчитинэн улахан кинигэ тахсара былааннанар. Ол туһунан уонна «Ай» студия үлэтин сүнньүнэн, киириэхтээх уларыйыылары Е.Д.Дьячковская билиһиннэрдэ.
Үөһэ этиллибитин курдук бу сыл иһигэр «Чурапчыга чочуллубут» бренд оҥоһуллан тахсыахтаах. Маны хайдах олоххо киллэрэри, көрүү-күрэс балаһыанньатын Светлана Попова сырдатта. Оттон «Ай» студия чопчу быйылгы сыллаах былааннарын, буолуохтаах тэрээһиннэри Айылгы Пинигина кэпсээтэ, ырытыһыыны, санаа атастаһыытын тэрийдэ.
Форумҥа кэнсиэпсийэ эрэ тула буолбакка уопсай үлэ сүнньүнэн кэпсэтии таҕыста, нэһилиэктэн кэлбит бэрэстэбиитэллэр эмиэ санааларын эттилэр, интэриэһиргиир ыйытыыларын биэрэн хоруй ыллылар.
Наталья Сибирякова, ааптар видеота