Саха сиригэр физкултуурунай хамсааһын 100 сылын түмүктүүр тэрээһинин чэрчитинэн «Чурапчы — бу дьоллоох түһүлгэ» кинигэ сүрэхтэннэ.
Саҥа кинигэни Чурапчытааҕы физкултуура уонна успуорт үнүстүүтүн преподавателэ Виктор Дьяконов хомуйан оҥордо. Бу бырайыакка Чурапчы спортсменнара, тренердара, спорт салайааччылара өрөспүүбүлүкэ физкультуратын, спордун сайдыытыгар киллэрбит дьоһун кылааттара сырдатылынна. Кинигэ архыып докумуоннарыгар, олоххо буолбут түгэннэргэ, бэчээккэ тахсыбыт матырыйаалларга олоҕуран оҥоһулунна. Маны таһынан араас кэмҥэ ыытыллыбыт ыспартакыйаадалар уонна Чурапчы улууһун кэнники сылларга спортка көрдөрбүт түмүктэрэ киирдилэр.
Таһаарыы улуус дьаһалтатын үбүлээһининэн, «Сайдам» кинигэ кыһатыгар 200 ахсаанынан бэчээттэнэн таҕыста.
Үөрүүлээх дьаһалга улуус баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников, Чурапчы нэһилиэгин баһылыга Владимир Сивцев, Илин эҥэр улуустар бэрэстэбиитэллэрэ, успуорт бэтэрээннэрэ уонна успуорду сэҥээрээччилэр кыттыыны ыллылар.
Бэлиэ күҥҥэ кинигэ ааптарыгар уонна кинигэ тахсыытыгар үлэлэспит дьоҥҥо улуус, нэһилиэк салалтатын наҕараадаларын туттардылар.
Компьютернай таҥыыга, интэриниэт ситимиттэн туһааннаах информациялары булууга, ону сэргэ илиинэн суруллубут материаллары бэчэттииргэ Чурапчы улууһун оҕо уонна ыччат спортивнай оскуолатын үрдүкү инструктора Светлана Эверстова үлэлээбит. Кини:
«Кинигэ Саха сиригэр физкултуурунай хамсааһын тэриллибитэ 100 сылыгар ананна. Бастакы спортивнай хамсааһын тэриллиитигэр сүҥкэн кылааттарын киллэрбит Николай Кривошапкин — Уот Субуруускай уонна да атын Чурапчы улууһуттан төрүттээх салайааччыларбыт үлэлэрин сырдатар ыстатыйалар, ону туоһулуур докумуоннар киирдилэр. Бу кинигэ уратыта, интэриэһинэйэ диэн, спортсменнар, тренердар эрэ тустарынан буолбакка, чуолаан спорт тэрийээччилэрин, салалта үлэтин-хамнаһын сырдатыы буолар. Спорт сайдыытыгар, биллэн турар, спорт салалтата улахан оруоллаах. Кинилэр өйөбүллэринэн, көмөлөрүнэн үтүө түмүктэр, үрдүк көрдөрүүлэр тахсаллар буоллаҕа.
Маны таһынан кинигэҕэ Чурапчы улууһугар ыытыллыбыт спортивнай тэрээһиннэр сырдатылыннылар. Холобур, 90-с сылларга Чурапчыга «Ветеран сулустар» улахан тустуу күрэҕэ буолбут. Онно Олимпийскай чөмпүйүөннэрбит, улахан түһүлгэлэргэ чөмпүйүөнээбит бэтэрээннэр кыттыыны ылбыттар. Бу туһунан кыра брошюра эрэ баар буоллаҕына, билигин бу кинигэҕэ киирэн, үйэтитилиннэ», — диэн кинигэ ис хоһоонун билиһиннэрдэ.
Марфа Петрова
Сэмэн Жендринскэй хаартыскаҕа түһэриитэ