Кулун тутар 21-22 күннэригэр СӨ култууратын үтүөлээх үлэһитэ, СӨ үөрэҥириитин уонна култууратын туйгуна, сахалыы остуол оонньууларыгар СӨ успуордун маастара, Үөдүгэй, Мэйик нэһилиэктэрин, Үөһээ Бүлүү улууһун Бочуоттаах олохтооҕо, Бүлүү түбэтигэр оһуохай сайдыытыгар сыратын ууран үлэлээбит, өрөспүүбүлүкэҕэ бастакынан сахалыы остуол оонньууларын тэрийээччи, көҕүлээччи Дмитрий Федотов 90 сааһыгар анаммыт хабылыкка уонна хаамыскаҕа өрөспүүбүлүкэтээҕи күрэхтэһии ыытылынна.
Барыта холбоон 11 оройуонтан 84 ыспарсымыан тиийэн кытынна. Чурапчы улууһуттан үс киһилээх дэлэгээссийэ тиийэ сырытта. Икки күн устата Дмитрий Яковлевич кыыһа Ольга Дмитриевна, сиэн кыыһа аҕаларын, эһэлэрин олоҕуттан, кини хабылык, хаамыска сайдыытыгар киллэрсибит кылаатын туһунан мустубут дьоҥҥо билиһиннэрдилэр, кэпсээтилэр.
Бастакы күн, “Күөрэгэй”, “Сулус” көрүҥнэргэ Чурапчыттан Эрчим Барашков 3 миэстэни оттон сахалыы остуол оонньууларыгар СӨ маастара Андрей Деллохов 1 миэстэни ылары ситистилэр.
Иккис күн, “Хабылык”, 5, 7 “Хаамыска”, “Умсаах” көрүҥнэргэ Алексей Васильев уонна Эрчим Барашков бочуоттаах үһүс миэстэлэри ылаттаатылар.
Манна даҕатан эттэххэ, “Федотовтыы” 9 хаамыскалаах абсолютнай күрэх бу эрэ түһүлгэҕэ тэриллэн барар. Маҥнай 2020 сыллаахха тэриллиитигэр муҥутуур кыайыылааҕынан Төлөй орто оскуолатын дириэктэрэ Андрей Васильевич Деллохов кыайыылаах буолан турардаах.
Күрэхтэһии сүрүн судьуйатынан СӨ успуордун маастара, Чурапчы улууһун хамаандатын чилиэнэ Дархан Степанов бэрт сатабыллаахтык тэрийэн үлэлээтэ.
Ыспарсымыаннар түгэнинэн туһанан, улуустааҕы остуол оонньууларын бэдэрээссийэтин бэрэссэдээтэлигэр Анатолий Александровка, улуустааҕы успуорт упрвалениетын начаалынньыгар Дьулустаан Егоровка айаҥҥа күүс-көмө, сүбэ-ама буолбуттарыгар дириҥ махталларын тиэрдэллэр.
Сэмэн ЖЕНДРИНСКЭЙ