Балаҕан ыйын 15-28 күнүгэр Новгородскай уобалас Цемена дэриэбинэтигэр “Вахта памяти 2024” сылын ахсын ыытыллар поисковай үлэҕэ Саха сириттэн, чуолаан: Таатта, Амма улуустарыттан уонна буойун-учуутал Иван Павлов аатынан Чурапчы орто оскуолатыттан кыттыыны ылан кэллилэр.
Бу туһунан Иван Павлов аатынан Чурапчы орто оскуолатын үөрэнээччилэрин патриотическай иитиигэ педагога Дмитрий Иванович Попов кэпсээтэ: “Саха сириттэн сылдьар поисковай үлэ этэрээтэ 19-с хайыһар биригээдэтин аатын сүгэр. Салайааччыбыт Иван Павлов аатынан түмэл дириэктэрэ Михаил Дьячковскай сүрүннээн үлэни иилиир-саҕалыыр.
Таатта улууһуттан Нюргуяна Михайловна Лебедева салайааччылаах түөрт үөрэнээччи, Амма улууһун Мээндигэ нэһилиэгиттэн Алексей Сергеевич Кириллин салайааччылаах эмиэ түөрт оҕо, Иван Павлов аатынан Чурапчы орто оскуолатыттан Дмитрий Иванович Попов, Василий Васильевич Макаров салайааччылардаах 8 «Б» кылаас үөрэнээччилэрэ: Дамир Сотников, Владик Местников, Ньургун Ефремов, Эрчимэн Акимов, Владик Красильников барыта холбоон 13 оҕо уонна 4 салайааччы поисковай үлэҕэ кыттыһан кэллибит.
Үлэбит сүрүн сыалынан Аҕа дойду Улуу сэриитин 80 сылын көрсө сэрии кэмигэр сураҕа суох сүппүт буойуттары көрдөөһүн этэ. 2023 сыллаахха үлэбит түмүгүнэн биир буойун-саллаат уҥуоҕа булуллубута. Быйылгы үлэбит түмүгэр икки буойун- саллаат унуоҕа уонна элбэх гранаталар, миинэлэр, гильзэлэр көһүннүлэр.
Биһиги иккис сылбытын «Звезда» поисковай этэрээтин кытта үлэлэһэбит. Салайааччыбытынан Алексей Викторович Степанов буолар. Оҕолор бэйэлэрин эттэринэн-хааннарынан поисковай үлэ сатабылын биллилэр, сэрии буолбут сирин көрдүлэр-иһиттилэр. Вахта устата 19-с хайыһар биригээдэтин былааҕын илдьэ сырыттыбыт.
Кэлэн иһэн Ильмень күөлгэ Саха саллааттарыгар туруоруллубут өйдөбүнньүк пааматынньыкка тыыннаах сибэкки дьөрбөтүн уурдубут, биир дойдулаахтарбытын өйдөөн-санаан аастыбыт. Оҕолор хоһоон ааҕан, хомуска оонньоон хорсун буойуттары кэриэстээтилэр. Санкт-Петербург куоракка Александр Пушкин аатынан оскуолаҕа бэйэбит үлэбитин үөрэнээччилэргэ, учууталларга билиһиннэрдибит. Смоленскай уобалас дэлэгээссийэтин кытта билсэн, салгыы бииргэ үлэлэһэр туһунан кэпсэттибит. Пискаревскай мемориальнай кылаабыһаҕа сылдьан эмиэ тыыннаах сибэккини уурдубут. «Ленинград блокадатын уонна оборуонатын», «Байыаннай тиэхэньикэ уонна артиллерия» түмэллэригэр сырыттыбыт.
Сылын аайы Саха сирин бастайааннай бэрэстэбиитэлистибэтэ барарбытыгар-кэлэрбитигэр улахан көмөнү оҥорор. Бэрэстэбиитэлистибэ салайааччытыгар Евгений Михайлович Петровка, патриотическай иитии үлэһитигэр биһигини арыаллыыр Ольга Анатольевна Баскаковаҕа махталбытын тиэрдэбит. Оскуолабыт директорыгар Николай Николаевич Поповка, поисковай этэрээппит салайааччытыгар Михаил Владимирович Дьячковскайга, 8-с «б» кылаас салайааччытыгар Павлина Артемовна Матвееваҕа уонна күүс-көмө буолбут төрөппүттэрбитигэр барҕа махтал тылларын аныыбыт”.
Сэмэн ЖЕНДРИНСКЭЙ