Бу нэдиэлэҕэ улуус баһылыгын Степан Саргыдаевы кытта Хоптоҕо уонна Чурапчы нэһилиэктэригэр баар хаһаайыстыбаларга сырыттыбыт. Ол курдук, Хоптоҕоҕо Иван Сергеев уонна Чурапчыга Иван Монастырев хотоннорун көрдө, кыстыкка бэлэм хайдаҕын билистэ.
Иван Сергеев уопсайа 150-тан тахса төбөлөөх, онтон ыанар ынаҕа – 70-тан тахса. Саҥа туттубут механизированнай хотонугар 80-ча ынах сүөһү турар.
- Бу саҥа хотоммун “Дьиэ кэргэн фермата” гранынан тутуннум. Грантан үбүлээһинэ 70% уонна бэйэм 30% утары уктум. Граҥҥа кыл мүччү хапсан, үөрэн-көтөн, онно эбии күһүммүт уһаан, туран биэрэн, хотоммутун олоххо киллэрдибит. Онон маннык өйөбүллэр бааллара биһигини үөрдэр.70 ыанар ынахха диэн туттубутум да, билигин 80-ча киирдэ.
Икки хотонунан үлэлиибит, 6 үлэһиттээхпин. Кыстыкка бэлэммит, быйыл от үүнүүтэ да, хаачыстыбата да үчүгэй. Сүөһү аһылыгын бэлэмнээһиҥҥэ эмиэ үлэлиибит, 66 гектарга сенаж ыһабыт. Бу гранынан быйыл эбии ротор, пресс-подборщик уонна сенаж эрийэрбитин ылбыппыт. Онон эһиил сенажпытын улаатыннарар былааннаахпыт, — диэн Иван Сергеев кэпсиир.
Оттон Иван Монастырев хотонугар 70 төбөнү кыстыкка киллэрэн, көрө сылдьар. Тиийбиппитигэр уолаттар идэһэлээн, үлэ-хамнас күөстүү оргуйа турар. Иван: “Кыстыкка бэлэммит, от, эбии аһылык баар, барыта үчүгэй, көрүүгэ эбии сүөһүлэри ылыахпын сөп”, — диэтэ.
Оттон улуус үрдүнэн кыстыкка бэлэм хайдаҕый диэн боппуруоска тыа хаһаайыстыбатын салалтатын начаалынньыга Анжелика Неустроева билиһиннэрэр:
- Биһиги улуус кыстыкка толору бэлэмнээх киирэн эрэбит. Быйыл күммүт-дьылбыт туран биэрэн, хаһааҥытааҕар даҕаны элбэх от оттонно. Ол курдук 41674 т оттоон, былааммытын 107% толордубут. Хортуоппуйга, оҕуруот аһыгар, сиилэскэ, сенажка былааннар 100% туоллулар. Туорахтаах култуурабытыгар, бурдукпутугар 52% буолла, онтон атын былааннары барытын толордубут.
Үүккэ 9 ый түмүгүнэн 104%-ҥа таҕыстыбыт. Сыллааҕы былааммыт 5200 т буоллаҕына, 4316 т үүтү соҕотуопкалаатыбыт.
Ити курдук, күн-дьыл туран биэрэрэ тыа хаһаайыстыбатынан дьарыктанааччыларга элбэҕи быһаарар. Онон быйыл чурапчылар кыстыгы этэҥҥэ туоруулларыгар санаалара бөҕөх.
Елена Макаринская.
Ааптар хаартыскалара уонна видеота