Чурапчыбыт улууһугар күн бүгүн кэрэни кэккэлэтэ, үтүөнү үксэтэ, айа-тута сылдьар уран тарбахтаах кэрэ аҥаардар аҕыйаҕа суохтар. Онтон биирдэрэ—Варвара Бурнашева. Бу күннэргэ кини «Сүрэҕим симэхтэрэ» үбүлүөйдээх тус быыстапката «Айылгы» норуот айымньытын дьиэтигэр, Мунхалов галереятыгар турда. Манна Варвара Гаврильевна айан, оҥорон таһаарбыт таҥаһын-сабын, оҥоһуктарын таһынан, кини салайар «Сиэл тойуга» түмсүүгэ дьарыктанар үөрэнээччилэрин оҥоһуктара итиэннэ төрөппүт кыргыттара эмиэ илиилэрин сылааһын иҥэрэн оҥорбут таҥастара, уруһуйдара, куукулалара уо.д.а. дьон көрүүтүгэр таҕыстылар.
Варвара Гаврильевна—уус-уран оҥоһуктарга ураты буочардаах норуот маастара, улууспут кылынан, сиэлинэн хатан сөрүөттэн саҕалаан араас моһуоннаах оҥоһуктары чочуйааччылартан биир бастыҥнара. Кини айар кутун дьиэ кэргэнин сылаас эйгэтигэр эмиэ иитиэхтээн, иҥэрэн төрөппүт биэс нарын-намчы кыргыттара эмиэ айар куттаах кэрэ куолар. Иис-күүс, үҥкүү, бэйэ илиитинэн куукуланы оҥоруу, уруһуй эйгэлэрин баһылаан күннэтэ айар-тутар дьон. Аҥардас ийэлэрэ түһэрбит хаартыскаларынан ойуулаах шоппер-суумкалара даҕаны киһи болҕомтотун тардаллар.
Онон улууспут бары олохтоохторун интэриэһинэй быыстапканы көтүппэккэ көрөргүтүгэр ыҥырабыт!
Наталья Сибирякова, ааптар хаартыскалара, видеота