Бу күннэргэ Чурапчытааҕы «Маарыкчаан» коолекционердар түмсүүлэрэ Ытык Бахсыга сэргэх тэрээһиҥҥэ баран кыттан кэллибит. 
Икки улуус коллекционердара муһуннубут:Мэҥэттэн Төҥүлү, Тумул, Хаптаҕай, Майа коллеционердара, биһигиттэн «маарыкчааннар»уонна хадаардар түмүстүбүт.Бахсылар арыылаах алаадьынан айах тутан, арчылаан көрүстүлэр. Салгыы коллекцияларбытын тэниччи тардан, быыстапка киэҥ түһүлгэтин тэрийдибит. 
Ол быыһыгар ким атастаста, ким атыылаата. Мунньууларбытын элбэх киһи кэлэн сэргии, кэрэхсии көрдө. Быыстапканы көрүү түмүгүнэн бириистээх анал ааттар олохтоммуттар. «Саамай былыргы мал» аат Хаптаҕайтан сылдьар В.И.Соломоноваҕа тигистэ. Кини 1900 сылга оҥоһуллубут былыргы бэйэ оҥоһуу тимир тоһоҕолорун аҕалбыт. «Саамай кыра мал» анал ааты биһигиттэн К.К. Эверстова ылла. Клавдия Капитоновна араас матырыйааллартан оҥоһуллубут атах таҥаһа быһыылаах сувенирдары мунньар. Манна кини кып-кыра фианит таастаах үрүҥ көмүһүнэн оҥоһуллубут түүппүлэ подвескатын аҕалан, үгүс дьон сэҥээрэн, анал аакка тиксиэн тигистэ. «Саамай улахан экспонат» анал ааты эмиэ биһиги коллекционербыт О.М.Окорокова былыргы ийэтин былаатын иһин тигистэ. «Элбэх көрүҥ коллекциялаах кыттааччы» аатын бары ытыктыыр киһибит, Төҥүлү коллекционердарын түмсүүтүн салайааччы Е.В. Михайлова ылла.
Быыстапка кэнниттэн баай-талым астаах-үөллээх остуол тула олорон, итии чэй иһэ-иһэ, иһирэхтик кэпсэттибит. Быыһыгар, араас көрдөөх оонньуулары тэрийэн сэргэхситтилэр.
Ити курдук, ыалдьытымсах дьонноох-сэргэлээх Ытык Бахсы сиригэр дуоһуйа сынньанан, элбэҕи билэн-көрөн, кэллиэксийэлэрбитин бэйэ-бэйэбитин кытта атастаһан, атыылаһан, үөрэн-көтөн тарҕастыбыт.
Умнуллубат үтүөкэн тэрээһини тэрийбит Бахсытааҕы «Сырдык эйгэ» норуот айымньытын дьиэтин коллективыгар, биир санаалаах, интэриэстээх коллекционердарбытыгар барҕа махталбытын тиэрдэбит. Үлэҕитигэр олоххутугар ситиһиилэри, коллекцияҕыт байа-хаҥыы турдун!
Анастасия Аргунова.