Чурапчы улууһугар улуус баһылыгын 2024 сыллааҕы үлэтин отчуота саҕаланна. Бүгүн улуус баһылыгын социальнай боппуруостарга солбуйааччы Мария Кронникова салайааччылаах иккис бөлөх Чакыр нэһилиэгэр үлэлээтэ.
Мунньахха 55 нэһилиэк олохтооҕо кытынна.
Дьаһал Дойду, өрөспүүбүлүкэ уонна улуус өрөгөй ырыаларынан саҕаланна. Салгыы 2024 сылга ыытыллыбыт үлэни-хамнаһы сырдатар видеоролигы күөх экраҥҥа көрдөрдүлэр.
Сүрүн дакылааты улуус дэлэгээссийэтин салайааччыта Мария Кронникова оҥордо. Кини үүммүт Саҥа сылынан эҕэрдэлээн туран, үтүө суобастаах үлэтин иһин СӨ Доруобуйа харыстабылын туйгунугар Раиса Саввиноваҕа «Чурапчы улууһун туйгуна» бэлиэни уонна улуус баһылыгын Махтал суругун муниципальнай сулууспа бэтэрээнигэр Александра Адамоваҕа туттарда.
Бу нэһилиэккэ оскуола тутууллуута сытыы боппуруоһунан буолар. Онуоха өрөспүүбүлүкэҕэ уочаракка турарын, 18 миэстэттэн 11 миэстэҕэ тахсыбытын, бу үлэни түргэтэтэргэ үлэлэһэллэрин, бырайыактыыр үлэтэ бара турарын туһунан улуус баһылыгын тутуу боппуруостарыгар солбуйааччы Афанасий Дьячковскай эппиэттээтэ.
Маны сэргэ олохтоохтор үйэтитиигэ, чуолаан 2025 сылга тохсунньуга Эрилик Эристиин түмэлин 50 сыла туоларынан, түмэл статуһун үрдэтэргэ үлэ ыытылларыгар туруорустулар.
Оттон ыйытыыларга киирдэххэ, нэһилиэктэр икки ардыларынааҕы социальнай куоталаһыы, бэстибээл балаһыанньатын, Туһумахтаахха гаас, уот ситимэ тардыллыытын туһунан туоһуластылар. Маны сэргэ Чакырга саҥа үлэҕэ киирбит дьиэлэргэ уу-хаар харгыһа суох үлэлииригэр баҕаран туран, куһаҕан ууну таһар массыына үлэтин чопчуластылар.
Маны таһынан тыа хаһаайыстыбатыгар үгүс боппуруос киирдэ. Ол курдук, улууска төһө кэпэрэтиип үлэлиирин, кыра кыамталаах хотон тутуутугар көмө көрүллүүтүн итиэннэ үүт харчытын, ынах төбөтүгэр бэриллэр көмө үрдээһинин, племеннай оҕус кэлиитин уонна арыы сыанатын туһунан боппуруостар көтөҕүллэн, эппиэттэннилэр.
Мунньах кыттыылаахтара «Хайахсыт- Бүтэйдээх», «Хадаар- Чакыр» суолларын өрөмүөнүн, биэнсийэлээх киһи самозанятай буоларыгар нолуок төлөбүрэ хайдах буоларын ыйыталастылар. Ону сэргэ хамнас үрдээһинин, нэһилиэк бүддьүөтүн балаһыанньатын туоһуластылар. Доруобуйа харыстабылыгар МРТ аппараатын, стоматология үлэтин туһунан боппуруостары биэрдилэр.
Олохтоохтор улуус дьаһалтата сөптөөх суолу тутуһан үлэлиирин бэлиэтээн туран, 2024 сыллааҕы үлэтин 100% сөптөөҕүнэн сыаналаатылар.
Марфа Петрова, ааптар хаартыска түһэриитэ, видеоҕа устуута