2024 сыллаахха, СӨ Ил Дархана Айсен Николаев Үлэ сылыгар олохтообут “Үлэ киhитэ” бириэмийэтигэр талыы үс түһүмэҕин түмүгүнэн ѳрѳспүүбүлүкэ бастыҥ 50 үлэhит дьонун ааттара биллибиттэрэ.
Бүгүн улуус дьокутааттарын Сэбиэтин уочараттаах сессиятыгар, буойун-учуутал Степан Кузьмич Макаров аатынан Чурапчы гимназиятын физика предметин учууталыгар, норуот үөрэхтээһинин туйгунугар, РФ үтүөлээх учууталыгар, СӨ “Учууталлар учууталлара” бэлиэ хаһаайыныгар, “Билиигинэн кыайыаҥ” пуонда хас төгүллээх кыайыылааҕа Мария Иустиновна Хоютанованы Чурапчы улууһун Бочуоттаах олохтооҕо аат иҥэрэр туһунан быһаарыылара таҕыста.
Чурапчы улууһа үлэни өрө туппут, бэйэлэрин өйдөрүн-санааларын, билиилэрин-көрүүлэрин ууран улуус, өрөспүүбүлүкэ сайдыытыгар сүҥкэн кылааттаах үгүс дьонноох кинилэртэн биирдэстэрэ Мария Иустиновна Хоютанова буолар.
Буойун-учуутал Степан Макаров аатынан Чурапчытааҕы гимназия үрдүкү категориялаах физикаҕа учуутала Мария Иустиновна туһунан киһи үгүһү суруйуон сөп. Үрдүк квалификациялаах, өрүү инники күөҥҥэ сылдьар баай уопуттаах, мэлдьи саҥаттан-саҥаны айа-тута сылдьар улууспут биир күөн туттар педагогунан буолар. Итини таһынан кини улуус, өрөспүүбүлүкэ учууталларыгар, үөрэнээччилэри научнай-чинчийэр үлэҕэ сыһыарыы тиэмэтигэр методическай үлэни күүскэ тэрийэр.
Гимназияҕа үлэлиир 27 сыл былаһын тухары Мария Иустиновна быһаччы салалтатынан үрдүк таһымнаах 240 научнай-чинчийэр дакылаат сурулунна. Ол иһиттэн 45 үөрэнээччи норуоттар икки ардыларынааҕы научнай куонкурустарга уонна кэмпириэнсийэлэргэ, Бүтүн Арассыыйатааҕы улахан күрэхтэргэ лауреат уонна призер аатын ылары ситистилэр, 90-ча үөрэнээччи өрөспүүбүлүкэтээҕи “Инникигэ хардыы” НПК муҥутуур кыайыылаахтарынан, призердарынан буоллулар.
Үөрэнээччилэр научнай-чинчийэр үлэҕэ кыттыыларыгар үрдүкү көрдөрүүтүн иһин, “Зиминнэр Династияларын” Пуондата физика уонна математика учууталларыгар олохтообут Бүтүн Арассыыйатааҕы куонкурус “Эдэр учуонайдар настаабынньыктара” номинация түөрт төгүллээх кыайыылааҕа, өр сыллаах эҥкилэ суох үлэтин иһин Дойду Бэрэсэдьиэнин бочуотунай грамотатынан наҕараадаламмыта, 2006 сыллааҕы “Бастыҥ учуутал”, РСФСР норуодунай үөрэхтээһинин туйгуна, “СӨ учууталлар учууталларын” бэлиэ хаһаайына, РФ Үтүөлээх учуутала, 2023 сыллаахха Саха сирин бастакы бэрэсидьиэнэ Михаил Николаев аатынан “Билиигинэн кыайыаҥ” стипендия кыайыылааҕа Мария Иустиновна Хоютанова чахчы да бэйэтин идэтигэр бастыҥын толору туоһулууллар. Маннык үтүөкэннээх үлэһит киһи үөрэнээччилэрин, кэллиэгэлэрин, төрөппүттэр ортолоругар улахан аптарытыатынан туһанар.
Сэмэн ЖЕНДРИНСКЭЙ