Оҕо киһи хараҕар учуутал хаһан баҕарар холобур буолар. Биир оннук учууталынан Чурапчытааҕы республиканскай ыспартыыбынай олимпийскэй эрэллэри бэлэмниир орто оскуола-интэринээт нуучча тылын уонна литэрэтиирэтин учуутала, улуустааҕы “Эдэр учуутал-2023” куонкурус муҥутуур кыайыылааҕа, улуус эдэр учууталларын уопсастыбаннай түмсүүлэрин бэрэссэдээтэлэ, 7 “б” кылаас тапталлаах салайааччыта Антон Сидорович Фомины ааттыахпытын сөп.
2019 сыллаахха Максим Аммосов аатынан Хотугулуу-илиҥҥи университет филологическай факультетын бүтэрбитэ. Онно үөрэнэ сылдьан үһүс куурус кэнниттэн академ ылан Арассыыйа сэбилэниилээх күүстэрин кэккэтигэр баран сулууспалаан кэлбитэ. Хабаровскай уонна Приморскай кыраайга сибээс чааһыгар сулууспалаабыта. Ити кэмтэн ылата интэринээт-оскуолатыгар тиһигин быспакка үлэлии-хамсыы сылдьар.
Үтүө суобастаах үлэһит, киэҥ билиилээх исписэлиис бэйэтин идэтигэр элбэх эдэр ыччаты уһуйда. Эдэр, кэскиллээх учуутал үөрэнээччилэрин кытары өрүү бииргэ ону-маны тэрийэллэрин, үлэҕэ-хамнаска куруутун күргүөмүнэн сылдьалларын туһунан үгүс киһи астына, сөҕө-махтайа кэпсиир.
Антон Сидорович эдэр ыал амарах аҕата. Ол эрээри дьиэ кэргэн түбүгэ кинини хаһан да мэһэйдээбэт курдук: эдэр учууталлар методическай түмсүүлэрин салайааччытын быһыытынан араас өрүттээх үлэлэри ыытыһар, аны Петр Решетников аатынан Чурапчытааҕы норуодунай тыйаатыр солбуллубат биир чаҕылхай артыыһа.
Учуутал – ол аата атыттартан биир хардыы инники иһэр киһи. Ол да иһин Антон Сидорович Фомин бэйэтин билиитин хаҥатыыга күннэтэ дьаныһан үлэлиир, сэминээрдэргэ көтүппэккэ сылдьар, республиканскай педагогическай ааҕыыларга көхтөөхтүк кыттар. Ол да иһин кини мэлдьи холобурга сылдьар.
Сэмэн Жендринскэй