Бүгүҥҥү бэлиэ күнүнэн, биһиги тэрилтэ төһүү үлэһитин, улуус кииннэммит бухгалтериятын учуоттуур бөлөҕүн начаалынньыга, быйыл 60 сааһын туолбут Лидия Прокопьевна Данилова туһунан сырдатыахпытын баҕарабыт.
Лидия Прокопьевна, Олоҥхо дойдутунан сураҕырбыт Сунтаар оройуонун Сиэйэ сэлиэнньэтигэр сэттэ оҕолоох улахан дьиэ кэргэҥҥэ төрдүс оҕонон күн сирин көрбүтэ. Лида сэттэ саастааҕар аҕалара ыалдьан эрдэ өлөн, ийэлэрэ сэттэ оҕону соҕотоҕун атахтарыгар туруорбута. Оҕолор бэйэ-бэйэлэрин өйөсүһэн, хардарыта көмөлөһөн бары үрдүк үөрэхтээх үлэһит дьон буола үүнэннэн, күн-бүгүн араас эйгэҕэ ситиһиилээхтик үлэлии-хамсыы сылдьаллар.
Лида дойдутугар орто оскуоланы бүтэрэн баран, биир сыл Сунтаардааҕы 23 №-дээх СПТУ-га үөрэнэн штукатур идэтин баһылаабыта. Мантан сиэттэрэн олоҕун тутуу эйгэтин кытта сибээстиир баҕалаах, Алтайдааҕы политехническай институтка тутуу салаатыгар үөрэххэ киирбитэ. Барнаул политехническэй института Лидияҕа идэ эрэ биэрбэтэҕэ. Манна олоҕун аргыһын, Күөх Ньурба Хорулатыттан төрүттээх Евгений Афанасьевич Даниловы көрсөн, олохторун холбоон ыал буолбуттара. Эдэр ыал 1984 сыллаахха үөрэхтэрин бүтэрэн, иккиэн тутуу инженерэ дипломнаах Чурапчы оройуонугар Эрилик Эристиин аатынан совхозка үлэҕэ ананан кэлбиттэрэ. Евгений тутуу инженеринэн үлэтин саҕалаабыта. Онтон Лидия бастакы оҕолоро – уоллара күн сирин көрөн, ийэ буолар дьолун билбитэ.
Уоллара иккитин ааспытын кэннэ ийэлээх оҕо биирэ иитиллээччи, биирэ иитээччи быһыытынан Дириҥ детсадыгар кэлбиттэрэ. Лидия Прокопьевна манна биэс сыл иитээччинэн, иитээччи көмөлөһөөччүтүнэн үлэлээн баран, “ыал ийэтигэр сөптөөх идэ буолуо” диэн кэргэнинээн быһаарыныы ылынаннар, финансовай техникумҥа кэтэхтэн үөрэххэ киирбитэ. Үлэтин эмиэ уларытан “Үрдэл” КЭЦ үрдүкү бухгалтерынан үлэлээн барбыта. Оскуола саҕаттан ааҕар-суоттуур дьоҕурдаах буолан (математикаҕа республиканскай олимпиада кыттыылааҕа) үөрэҕин да, саҥа үлэтин да ыарырҕаппатаҕа. Салгыы саҥа тэриллибит Мэлдьэхси сельскэй администрациятыгар икки сыл бухгалтерынан, ол кэннэ 1995 сылтан Хоптоҕо сельскэй администрациятыгар главнай бухгалтерынан тохтоло суох 23 сыл устата таһаарыылаахтык үлэлээбитэ. Ол кэнниттэн И.Е. Федосеев – Доосо аатынан Дириҥ орто агрооскуолатыгар расчетнай бухгалтерынан, онтон 2019 сылтан бюджет тэрилтэлэрин бухгалтериялара улууска биир сиргэ кииннэнэнэннэр, улуус кииннэммит бухгалтериятыгар учуот группатын начальнигынан, уопсайа суот-учуот үлэтигэр 33 сылын, ситиһиилээхтик үлэлии олорор. Кини өр сыллаах үтүө суобастаах, таһаарыылаах үлэтин 2014 сылга улуус куоталаһыытын кыайыылааҕын «Сыл бастыҥ бухгалтера» анал аат, “Саха Республикатын муниципальный сулууспатын туйгуна” уонна “Улууска үтүөлэрин” иһин 3 степэннээх бэлиэлэр, ону таһынан улуус, нэһилиэк дьаһалталарын, финансовай эйгэсалалталарыттан элбэх грамоталара, махтал суруктара туоһулууллар.
Лидия Прокопьевна бэйэтигэр, үлэтигэр да эппиэтинэстээхтик, ирдэбиллээхтик сыһыаннаһар. Олох уларыйыытын, үлэ хаамыытын ситимнээн эмиэ кэтэхтэн үөрэнэн 2003 сыллаахха Саха государственнай университетын финансово-экономическай салаатын бүтэрбитэ. Специалист да, салайааччы даҕаны быһыытынан кинини үрдүктүк сыаналыыллар, убаастыыллар, эдэр коллегаларыгар бастыҥ сүбэһит, настаабынньык.
Лидия Прокопьевна тыа ыалын сиэринэн түбүгэ хаһан да бүппэт. Ол да буоллар общественнай үлэ үөһүгэр сылдьар. Нэһилиэккэ уонна тэрилтэҕэ ыытыллар үгүс общественнай дьаһалларга актыыбынай кыттааччы, дьону көҕүлээччи буолар.
Түөрт уон сыл анараа өттүгэр Чурапчыга үктэммит Даниловтар — Дириҥ сирин-уотун, дьонун-сэргэтин сөбүлээн дьиэ-уот туттан, түөрт оҕолорун төрөтөн, үөрэхтээн, ыал оҥортоон, сэттэ сиэннэнэн, сахалыы сиэринэн быр-бааччы олохтоох Хоптоҕо нэһилиэгин биир бастыҥ ыала буолан олороллор. 1991 сыллаахха сопхуостар эстиилэригэр ылбыт паай сүөһүлэрин тэнитэн сыллата 15 төбө сүөһүнү кыстаталлар, биэс ынахтарын ыан, үүтүн туттаран эбии дохуоттаналлар. Хайа уонна бэйэлэриниин биэс хаһаайыстыба сыл тахсар этэ-аһа бэйэлэрин илиилэриттэн тахсар буоллаҕа. Сайын оҕолор, сиэннэр кэлэн оттоһон, оҕуруот көрсөн, сир астаан, сынньанан бараллар.
Убаастыыр, холобур оҥостор бииргэ үлэлиир дьүөгэбитин Лидия Прокопьевнаны суот-учуот үлэһиттэрин күнүнэн эҕэрдэлиибит. Үлэҕэр үрдүк ситиһиилэри, дьиэ кэргэҥҥэр дьолу соргуну баҕарабыт.
Улуустааҕы кииннэммит бухгалтерия кэлэктиибэ
Бэлэмнээтэ Сэмэн ЖЕНДРИНСКЭЙ