2025 cыл Чурапчы нэһилиэгэр «Килбиэннээх Үлэ сыла» биллэриллэн, Дойду үрдүнэн Улуу Кыайыы 80, улууспут үбүлүөйдээх 95 сылынан, соторутааҕыта түөлбэ актыыбын күүһүнэн“Мурун Тыымпыйа” ТОС бэйэбит дьаһалбытын “Далькон” саалатыгар тэрийэн ыыттыбыт. Түөлбэ олохтоохторо, аҕам саастаахтар хото кэлэн кыттыыны ыллылар. «Килбиэннээх Үлэ» сылыгар сөп түбэһэр быыстапка туруоруллубуту сэҥээрэн көрдүлэр, дьоннорун хаартыскаларын көрөн үөрдүлэр. Дьоро киэһэбитин Мурун Тыымпыйаҕа дьон олохсуйуоҕуттан бүгүҥҥү күҥҥэ диэри бу томтор хайдах сайдан кэлбит устуоруйатын үчүгэйдик билэр В.П. Пудова иилээн-саҕалаан ыытта. Дьаһал, үгэс курдук, бэтэрээн үлэһиттэри чиэстээһиҥҥэ туһуланна.
«Чурапчы нэһилиэгэ» тыа сирин түөлбэтин баһылыга В.Д. Сивцев эҕэрдэ этэн наҕараадалары туттартаата. «Килбиэннээх Үлэ сыла» бэлиэни бу иннинэ дьаһал ыыппыт «Маарыкчаан» ТОС бэрэссэдээтэлэ Лилиана Григорьевна Николаева тыл этэн, олохтоохтору эҕэрдэлээн «Мурун Тыымпыйа» ТОС бэрэссэдээтэлигэр Елена Николаевна Семеноваҕа туттарда. Түөлбэбит территориятыгар баар тэрилтэлэрбит «Чурапчытааҕы А.П. Листиков аатынан үөрэтэр-оҥорон таһаарар киин» муниципальнай автономнай эбии үөрэхтээһин тэрилтэтин дириэктэрэ А.И. Александров, И.М. Павлов аатынан Чурапчы орто оскуолатын дириэктэрэ Н.Н. Попов кыттыыны ылан, түөлбэ салайааччыта олохтоохторбутун эҕэрдэлээн, өр сылларга үтүө суобастаахтык, таһаарыылаах үлэни көрдөрбүт бэтэрээннэргэ бэлэхтэри туттартаатыбыт. «Кыталык» уһуйаан (салайааччы В.П. Пудова) үлэһиттэрэ Христофор Максимов «Эйэ холуубун» квартетынан , И.М. Павлов аатынан Чурапчы орто оскуолатын оҕолорун «Айгыл» хомус ансаамбылын (салайааччы М.М. Слепцова) э5эрдэ нүөмэрдэрэ тэрээһини өссө ситэрэн-хоторон биэрдилэр. Минньигэс астаах, сылаас чэйдээх остуол тула олорон кэпсэтии буолла. Бэйэлэрин үлэлээбит сылларын өр сылларга “Промкомбинат” тэрилтэтигэр үлэлээбит 83 саастаах Мотрена Титовна Местникова А.П. Листиков дириэктэрдээн олорбут сылларыгар үлэ-хамнас хайдах барбытын туһунан, Монастыревтар династияларыттан “Промкомбинат” тэрилтэтигэр дириэктэринэн үлэлээбит Гурий Гурьевич Монастырев күүстээх үлэнэн тутуулар барбыттарын, И.М. Павлов аатынан Чурапчы орто оскуолатын өр кэмҥэ салайбыт, билигин И.М. Павлов аатынан «Бойобуой Албан аат» түмэлин дириэктэрэ Михаил Владимирович Дьячковскай оскуола үлэтин, «Кыталык» уһуйааҥҥа өр сылларга эҥкилэ суох поварынан үлэлээбит Анастасия Ионовна Дьячковская детсадын туһунан, Мурун Тыымпыйа бу сылларга хайдах курдук кэҥээбитин-сайдыбытын, о.д.а. ахтыылары оҥордулар. Киэһэбит бэрт сэргэхтик ааста, дьоммут дуоһуйа кэпсэтэн — ипсэтэн, үөрэн — көтөн, махтал тылларын этэн тарҕастылар. Ытыктабыллаах дьоммут, чэгиэнник, доруобайдык олоруҥ. Бары маннык түмсүүлээх буолуоҕуҥ!
«Мурун Тыымпыйа» түөлбэ салайааччыта Е. Н. Семенова