“Бу дьыл биһиэхэ кыайыы-хотуу үктэллээх саҕаланна. Ыһыахпыт бэс ыйын 26 күнүгэр Чурапчы улууһун учаастактарын ыһыаҕын кытары дьүөрэлээн тэриллэн, үрдүк үөрүүнэн ааста”, — “БООТУРДАР ТҮҺҮЛГЭЛЭРЭ” бырайыак ааптара Зинаида Дьячковская этэр.
Үрүҥ Айыы тойон ыйа — бэс ыйа Түөйэ олохтохторугар өссө биир үөрүүлээх түгэни бэлэхтээтэ, ол курдук “БООТУРДАР ТҮҺҮЛГЭЛЭРЭ” диэн эти-сиини эрчийэр, төрүт көрүҥнэри сайыннарар, оҕо оонньуур былаһаакката РФ Бэрэсидьиэнин Гранын сүүйдэ. Бырайыак уопсай сууммата 1 707 635 солкуобуйга тэҥнэстэ. Онон, төрүт көрүҥнэр сайдалларыгар, нэһилиэнньэ этэ-хаан өттүнэн чэбдигирэр, оҕо-аймах түмсэр, оонньуу-көрүлүүр, дьарыктанар сирэ олоххо киирэрэ бу ыган кэллэ.
“Түөйэ учаастагар бүгүҥҥүттэн эт-хаан эрчиллиитинэн дьарыктанар бырайыакпытын саҕалаатыбыт. Ону таһынан бэйэ икки ардыгар сүбэ-ама бэрсэн, санаа атастаһыытын төгүрүк остуола буолла. Бу бырайыакпытын Ольга Кардашевская салайааччылаах, “Коркинец” уопсастыбаннай түмсүүнү кытары ыкса үлэлэһэн, ситиһиигэ сирдээппитин бэлиэтиир тоҕоостоох. Тутуу үлэтин бүтүннүү, бэйэбит ыччаппыт Филипп Филиппович Монастырев иилээн-саҕалаан ыытыаҕа.
Бырайыак иһин билиһиннэрэр эбит буоллахха: мас тардыһыытын помуостара, хапсаҕай түһүлгэтэ, оҕунан ытыы, наартанан ыстаҥа дьарыктанар сирдэрэ мэлдьи үлэлиирдии аһаҕас туруохтара. Ону таһынан, ытыктыыр Улуу тириэньэрбит Дмитрий Петрович Коркин айан таһаарбыт дьарыктанар истиэнэтэ тутуллуоҕа. Остуол оонньууларыгар беседкалар, сүүрэргэ-көтөргө дьүөрэлээх аһаҕас сирдэр баар буолуохтара.
“БООТУРДАР ТҮҺҮЛГЭЛЭРЭ” сааһыттан, оҕолор, улахан да дьон кыахтарын таһымыттан тутулуга суох, ким баҕар кэлэн бэйэтин тус көрүҥүгэр дьарыгын булар эйгэтин тэрийиэхтээхпит.
Саха сирин үрдүнэн манныаха майгынныыр эйгэ, түһүлгэ ханна даҕаны суох. Түөйэҕэ – маҥнайгынан буолуоҕа. Бу бырайыагы Баһылай Манчаары аатынан “Модун” успуорт төрүт көрүҥнэрин киинэ, Чурапчытааҕы Вячеслав Карпов аатынан оҕону, ыччаты успуорка уһуйар оскуола, улуус дьаһалтатын успуорка управлениета өйүүллэрин биллэрдилэр. Самныбат санаалаах саханы иитиэххэ, сайдыылаах-кэскиллээх буолуоххайын!” – диэн Зинаида Дьячковская олус үчүгэйдик сэһэргээтэ.
Сэмэн ЖЕНДРИНСКЭЙ