Бу туһунан Чурапчы нэһилиэгин баһылыга Владимир Сивцев сыл түмүгүнэн бастыҥ үлэһиттэри, тэрилтэлэри чиэстиир үөрүүлээх дьаһалга биллэрдэ.
Бу олорор эйгэбит тупсуутугар суолталаах буолуоҕа. Сыл устата тутуу үлэтэ тэтимнээхтик барарыгар болҕомто ууруллуоҕа: киин паарканы оҥоруу, уулуссалары уотунан сырдатыы, сайыҥҥы уу ситимин тардыы, суолу өрөмүөннээһин, Куохара кытылын тупсаҕай оҥоруу уо.д.а.
Дьаһал үөрүүлээх чааһыгар нэһилиэк баһылыга Владимир Сивцев эҕэрдэлээн туран, ааһан эрэр сылга ыытыллыбыт сүрүн үлэни-хамнаһы билиһиннэрдэ. Баһылыгы сэргэ нэһилиэк дьокутааттарын Сэбиэтин бэрэссэдээтэлэ Василий Гуляев эҕэрдэ тылы эттэ.
Салгыы «Чурапчы нэһилиэгин Бочуоттаах олохтооҕо” үрдүкү ааты СӨ Үөрэхтээһинин туйгунугар Виктор Дьяконовка иҥэрдилэр. Чурапчы нэһилиэгин “Тоҕус томтор” бочуоттаах бэлиэтин Тырааныспар эйгэтин үлэһиттэрин настаабынньыгар Афанасий Кузьмиҥҥа, «Чурапчы нэһилиэгин сайдыытыгар кылаатын иһин” бэлиэни үлэ бэтэрээнигэр Марфа Дьячковскаяҕа уонна улуус дьокутааттарын сэбиэтин үлэһитигэр Егор Поповка туттардылар.
Ону сэргэ Д.П. Коркин кэриэһигэр Норуоттар икки ардыларынааҕы көҥүл тустууга турнир 125 киилэ ыйааһыҥҥа кыайыылааҕа Никита Софронов, урбаанньыт Антон Иванов Чурапчы нэһилиэгин Бочуотунай грамотатын, С.А. Новгородов аатынан Чурапчы орто оскуолатын техүлэһитэ Анисися Бурцева, «Сахатранснефтегаз” тэрилтэ үлэһитэ Михаил Оконешников, СӨ Социальнай сулууспа туйгуна Саргылана Пономарева Махтал суругун ыллылар.
Бэлиэ түгэнинэн улуус баһылыгын бастакы солбуйааччыта Рустам Данилов, улуус дьокутааттарын Сэбиэтин бэрэссэдээтэлэ Яков Оконешников кэлэн иһэр Саҥа Дьылынан эҕэрдэлээтилэр. Тус этиилэригэр буолаары турар федеральнай уларыйыыларга табыгастаахтык дьаһанан, кэлэр сылга сөптөөх үлэ тэриллэригэр эрэнэллэрин, Чурапчы киинэ биллэ тупсубутун бэлиэтээтилэр.
«Улуу Кыайыы 80 сылынан” үбүлүөйдээх бэлиэни Чурапчы нэһилиэгин бочуоттаах олохтооҕор Гурий Монастыревка, СӨ “Дьиэ кэргэн бэлиитикэтин сайдыытыгар кылаатын иһин” бэлиэни Чурапчы нэһилиэгин тыа сирин түөлбэтин сүрүн исписэлииһигэр Лина Трофимоваҕа, «Үтүө суобастаах үлэтин иһин” туйгун бэлиэтин урбаанньыт Семен Андросовка уонна самозанятый Вячеслав Сивцевка, улуус баһылыгын Махтал суругун «Хатан-строй” ХЭТ үлэһиттэригэр Станислав Федуловка, Марфа Мырееваҕа уонна СӨ Быраабытылыстыбатын Махтал суругун СӨ Эмчиттэрин конфедерациятын волонтеругар Анисия Беляеваҕа, СӨ Култуура министиэристибэтин Махтал суруга «Айыллаан” СК методиһигэр Александра Игнатьеваҕа туттардылар.
Чурапчы нэһилиэгэр 2025 сылга Килбиэннээх үлэ сыла биллэриллэн үгүс үлэ ыытылынна. Быйылгы 50 тыһ. суумалаах «Үлэ киһитэ” үрдүкү анал бириэмийэ урбаанньыт Руслан Хоютановка, кэтэх хаһаайыстыба хаһаайыныгар Николай Макаровка уонна Чурапчы улууһун волонтердарын хамсааһынын кураторыгар Евдокия Илларионоваҕа ытыс доҕуһуолунан туттарылынна.
Маны таһынан бу күн нэһилиэк тэрилтэлэрин икки ардыларыгар ыытыллар комплекснай спартакиада кыайыылаахтарын ааттаатылар. Барыта 12 холбоһуктаах хамаанда сыл устата култуура, успуорт эйгэтигэр куоталастылар. Кыайыылаахтарынан буоллулар: I бөлөххө I миэстэни “Дохсун”, II миэстэни “Дархан”, III миэстэни “Ситим” хамаандала ыллылар. II бөлөххө I миэстэни “Үрдэл”, II миэстэни “Түмэн”, III миэстэни “Cомоҕо” хамаандалара ыллылар. Нэһилиэк баһылыга кыайыылаахтарга 200, 150, 100 тыһ. суумалаах сэртипикээттэри туттарда.
Ольга Баишева, улуустааҕы социальнай харалта төлөбүрдэри аныыр отделын салайааччыта:
— Биһиги, «Үрдэл» холбоһуктаах хамаанда комплекснай спартакиада тэриллиэҕиттэн, 2003 сылтан ситиһиилээхтик, таһаарыылаахтык үлэлиибит. Номнуо иккис төгүлүн кыайыылаах аатын ыллыбыт. Бу комплекснай спартакиада иһинэн сыл устата култуура, спорт хайысхаларыгар тыҥааһыннаах күрэхтэһиилэр ыытыллаллар. Манна барытыгар биһиги түмсүүлээхпитин көрдөрөн, биир сомоҕо буолан, көхтөөхтүк кытынныбыт. Онон бастакы үрдэли ылан турарбытыттан олус үөрэбит, махтанабыт.
Марфа Петрова.