Хатылы киэҥ чараҥын бааһыналарыгар биэс комбайн биирдэ киирэн пятилетка төрдүс, тутаах сылын өлгөм үүнүүтүн хомуйан турардаах. Барыта 966 иэннээх сир хас биирдии гаатыттан 12,7 центнер бурдук астаммыта. Семен Литвинцев салайар звенотун үс комбайнера Саха АССР Үрдүкү Сэбиэтин Президиумун Бочуотунай грамотатынан наҕараадаламмыттара.
Семен Николаевич туораахтаах култуура ыһыытыттан үрдүк үүнүүнү ыфлар туһугар тиэхэньикэ күүһүн муҥутуурдук туһаныыга, бааһынаны таҥастааһыҥҥа кичэйиини, органическай уонна минеральнай уоҕурдуулары туттууга, ыһыы уонна хомуур үлэлэрин кылгас агрономическай болдьоххо ыытарга звенотун дьонун түмэр саталлаах салайааччы этэ.
Кыһынын уопсастыбаннай сүөһү кыстыгын эппиэттээх күннэригэр хомуньуус Литвинцев фермаларга оту таһыыга таһаарыылаах үлэ холобурун көрдөрөрө. “ДТ-75” тракторга икки волокушаны холбоон, икки кэбиһиилээх оту биирдэ тиэйэр бэртээхэй ньыманы оройуоҥҥа бастакынан баһылаабыта.
Улуу сирдьит Владимир Ленин төрөөбүтэ 100 сыла туолуутугар үбүлүөйүнэй мэтээлинэн, “Үлэҕэ килбиэнин иһин” мэтээлинэн наҕараадаламмыта. Өрөспүүбүлүкэҕэ тиийэн, биллэр чулуу механгизатор – 1973 сылга оройуон ЧӨМПҮЙҮӨН-РЕКОРДСМЕН КОМБАЙНЕРЫН аатын ылбыта. Оттон пятилетка тутаах сылыгар “ДТ-75” тракторынан 2883 эталоннай гектарга тэҥнэһэр үлэни оҥорон, 1973 сыллааҕы чөмпүйүөн Н.Н. Пермяков көрдөрүүтүн 436 гектарынан тупсарбыта. Ити кыайыытын иһин Семен Литвинцев 1974 сыллаахха оройуон ЧӨМПҮЙҮӨН-РЕКОРДСМЕН ТРАКТОРИҺЫН аалай лиэнтэни кэтэр чиэскэ тиксибитэ.
Семен Николаевич түмүктээһиннэрдээх сылларга 2900 эталоннай гектардаах үлэни толорорго үрдэтиллибит эбэһээтэлистибэни ылынан куоталаһыы инники күөнүттэн түспэтэҕэ.
Бэлэмнээтэ Сэмэн Жендринскэй