Күн илин саҕахтан сылааһынан сыдьаайбытынан тахсыбыта. Киэҥ бааһына кытыытынан, эрийэ-буруйа ыллык суолунан, аа-дьуо хааман иһэбин.
Сарсыардааҥы салгын күн уотуттан ууллан киһи иэдэһигэр ил гынар. Аттыбыттан күөрэгэй көтөн тахсан, эрэһэ долгуҥҥа күн уота күлүмүрдүүрүн санатардыы, салгыҥҥа уйдаран тырыбыныы-тырыбыныы ыллаан дьырылатар.
Бу киэҥ бааһыналарга сыл ахсын бурдук, хортуопуй ыһыллар. Урут манна үксүгэр күөх маассаны үүннэрэн отделение сүөһүтэ-аһа улаханнык абыранара, үрүҥ илгэни күрүлэччи ыырга көмөлөөх этэ. Оччотооҕу кэми санатан билигин даҕаны манна үлэ күргүөмнээхтик саҕаланар, күүстээх үлэ күөстүү оргуйар. “Сайдыы” бааһынай хаһаайыстыба баһылыга Данил Павлов оттооһуҥҥа, хортуопуй, бурдугу үүннэриитигэр аан бастакы үрдүк көрдөрүүлэри бу манна ситиспитэ, бар дьонун махталын ылбыта.
Урукку дьыллар быыстарын сэгэтэн көрөр эбит буоллахха, курааннаабыт халлаантан күн уота ордук күүскэ тыгара. Оччотооҕуга үс саастаах Данилка уол ол суоһуттан тиритэн-хорутан, хайыта хаппыт буорунан бурҕачыйар сайылык тэлгэһэтигэр оонньуу сылдьара. Сирэйэ-хараҕа көстүбэт буор буолбут. Ыстаанын элээмэтэ хас эмэ сиринэн бүүрэ анньыллан абырахтаммыт. Үөһэ өттө сайыны быһа сыгынньах сылдьан, күн уота килэриччи сиэбит. Атахтарын дуомнара, хайыта ыстаныахха айылаах, хатыран хаалбыттар… Ити кэмтэн ыла балай эмэ күн дьыл ааста, Данил Данилович билигин балай эмэ чиҥник атаҕар турбут улахан хаһаайыстыба тутаах, бас-көс киһитэ, төрөөбүт нэһилиэгэр Мындаҕаайыга эрэ буолбакка, бүтүн Чурапчы улууһугар үтүөтэ-өҥөтө улахан.
Үтүөкэннээх үлэһит бүгүн даҕаны тимир көлөтүн үрдүттэн түспэт, төһө даҕаны балаһыанньабыт ыараан истэр бурдугу, хортуопуйу үүннэриигэ күүскэ үлэлии сылдьар: “21 гаа сиргэ хортуопуй олордон ону көрө-истэ сылдьабыт, культивация түмүктэнэн билигин көмтөрүү үлэтэ буола турар.
Курааммыт сатыылаан ууну ыстарыынан дьарыктанабыт, билигин аҥарын ыстардыбыт. Кураан бэйэтин биллэрдэ, бурдук намыһах ону ааһан аһын кутан эрэр, кормовой эмиэ намыһах. Дьэ хайдах буолар… Сэлээркэбит боппуруоһа эмиэ ыараата, күһүн хайдах хомуйарбытын билиҥҥи туругунан быһаарыммакка сылдьабыт, ол эрэн санаабытын олох түһэрбэппит. Бүгүҥҥүттэн оттуур биригээдэм айаннаата, ходуһаҕа киирдилэр. “Мындаҕаайы” ТХПК-ны кытары дуогабарбыт быһыытынан былырыыҥҥыбыт курдук оттуохтаахпыт. Быйылгы наадыйар отун барытын биһиги хааччыйыахтаахпыт”.
Инникитин даҕаны хоһуун үлэһит саҥаттан саҥа ситиһиилэригэр саарбаҕалаабаппыт.
Сэмэн ЖЕНДРИНСКЭЙ