Ынаҕы искусственнай сиэмэлээһиҥҥэ киирии оройуон сорох фермаларыгар 1967 сылтан саҕаламмыта. Ол эрээри бу дьыаланы билигин да ситэ баһылыы иликпит. Оттон кинини олоххо киллэриигэ эппиэттээхтик сыһыаннаһар, бары бэлэмнэнии, тэрээһин үлэлэри кэмигэр тутуһар техник-осеменатордар биллэр-көстөр түмүктэнэллэр.
Биир оннук исписэлииһинэн Эрилик Эристиин аатынан сопхуос Хоптоҕотооҕу отделениетын техник-осеменатора хомуньуус Александра Корякина буолара. Кини урут оройуоҥҥа киэҥник биллэр, уопуттаах ыанньыксыт этэ. Мэлдьэхси учаастагын ыччат хомсомуолун ферматыгар старшайдаабыта. Икки тыһыынчалаахтар хамсааһыннарын биир бастакы көҕүлээччинэн буолбута. Оччотооҕу сопхуос салалтата кыһамньылаах сүөсүһүтү аналлаах оскуолаҕа үөрэттэрбитэ. Онтон ылата Александра Ивановна өр сылларга ынаҕы искусственнай сиэмэлээһиҥҥэ үлэлэспитэ.
Осеменатордаатаҕын бастакы сылыгар сиэмэлээбит ынахтарын буоһааһына колхуос орто көрдөрүүтүттэн үрдүк буолбута. Эһиилгитигэр, 1973 сылга, итини өссө тупсарарга бары дьоҕурун, мунньуммут уопутун саталлаахтык туһаммыта. Ол түмүгэр сиэмэлээбит ынахтарын 90,3 бырыһыана төрүөҕү биэрбиттэрэ. Осеменатордар куоталаһыыларыгар оройуон чөмпүйүөнэ П.О. Дмитриева кэнниттэн иккис миэстэлэммитэ.
Пятилетка төрдүс, тутаах сылыгар кини өссө үчүгэй ситиһиилэммитэ: искусственнай сиэмэлээбит ынахтарын 92 бырыһыаннара ууламмыта. Ити оройуон орто көрдөрүүтүттэн 15,3 бырыһыан үрдүгэ. Бу кыайыытын иһин Александра Ивановна Корякина 1974 сылга ОРОЙУОН ЧӨМПҮЙҮӨН ТЕХНИК-ОСЕМЕНАТОРЫН бочуоттаах аатын ылбыта.
Сельсовет дьокутаата, сопхуос парткомун чилиэнэ Александра Корякина пятилетка түмүктээһиннээх сылыгар өссө үрдүк көрдөрүүлэнэргэ дьулуспута.
Бэлэмнээтэ Сэмэн Жендринскэй