Үгэскэ кубулуйбут Чурапчы нэһилиэгин күнэ П.Е. Барахсанов аатынан култуура-сынньалаҥ пааркатыгар тэрилиннэ. Баай устуоруйалаах нэһилиэк быйыл төрүттэммитэ 377 сылын бэлиэтиир.
«Күһүҥҥү киһи күлбүтүнэн» диэн күһүҥҥү оҕуруот аһын атыы-тутуу дьаарбаҥката киэҥ хабааннаахтык тэрилиннэ, кырачаан оҕолоргоараас көрдөөх оонньуулар ыытылыннылар, аттракционнар үлэлээтилэр.
Улуу Кыайыы 80 сылыгар анаан «Албан аат» түмэлэ «Лица победы. Трудовая доблесть» диэн Арассыыйатааҕы аахсыйа чэрчитинэн быыстапка туруорда. Тэрээһин кэмигэр баҕалаах дьон анал байыаннай дьайыыга кытта сылдьар биир дойдулаахтарбытыгар анаан хаххалыыр сиэккэни өрдүлэр.
Тэрээһин үөрүүлээх чааһыгар нэһилиэк баһылыга Владимир Сивцев, Чурапчы улууһун баһылыгын бастакы солбуйааччыРустам Данилов, улуус дьокутааттарын Сэбиэтин бэрэссэдээтэлэ Яков Оконешниковмустубут дьону-сэргэни, ыалдьыттары бу бэлиэ күнүнэн эҕэрдэлээтилэр, быйылгы сылга ыытыллыбыт сүрүн үлэни-хамнаһы билиһиннэрдилэр. Ол курдук, быйылгы сыллаахха Мурун – Тыымпыйа түөлбэтигэр тимиринэн дьон хаамар тротуарын иккис аҥара, Иван Иванович Кандинскай аатынан Айыллаан култуура киинин иннигэр массыыналар турар парковкалара, «Куоҕалы» түөлбэҕэ сайыҥҥы водопровод “Олохтоох көҕүлээһини өйүүр” бырагырааманан олоххо киирбиттэрин эттилэр. Кыайыы 80 сылынан Кыайыы пааматынньыга, Чурапчы иһинээҕи суоллар өрөмүөннэммиттэрин, Егор Борисов аатынан уулуссаҕа аспаал тэлгэммитин, ону тэҥэ быйыл Уһук Илиҥҥи Федеральнай уокуруктар икки ардыларыгар ыытыллыбыт «Куорат тупсаҕай эйгэтин тэрийии» куонкуруска кыайыыны ситиһэн, «Куохара” үрэх кытылын тула, дьиэ кэргэн, эдэр ыччат түмсэр кэрэ көстүүлээх саҥа «Набережнай» оҥоһуллар буолбутун иһитиннэрдилэр.
Чурапчы нэһилиэгин баһылыга Владимир Сивцев: «Быйыл Чурапчыбыт күнүн сүрдээх улахан ситиһиилээх көрүстүбүт. Ол курдук, аҕыйах хонуктааҕыта Татарстаҥҥа Казань куоракка куорат тупсаҕай эйгэтин тэрийиигэ туһуламмыт Бүтүн Арассыыйатааҕы куонкуруска биһиги «Куохара үрэх кытылын тупсаран оҥоруу» барыйыакпыт кыайан,нэһилиэкпитигэр эһиилгэттэн 50 мөл. суумалаах тутуу барар буолла. Бу улахан кыайыы Чурапчыбыт нэһилиэгин олохтоохторо бары түмсэн,бииргэ үлэлээннэр кэллэ», — диэн эттэ.
Салгыы нэһилиэк чэчирии сайдарын туһугар үгүс кылааттарын киллэрэр дьону чиэстээннаҕараадалары туттардылар.
Тапталлаах Чурапчыбыт 377 сылынан,урбаанньыт Ульяна Заровняева халыҥ хамаандатынаан нэһилиэк олохтоохторун 377 устуука минньигэс бирээнньигинэн күндүлээтилэр. Бу түгэн Чурапчы нэһилиэгин иһинээҕи Рекорд кинигэтигэр киирдэ.
Мустубут ыалдьыттарга анаан бырааһынньыктааҕы кэнсиэрт тэриллэн, нэһилиэк талба талааннаахтара ырыаларын-тойуктарын, үҥкүүлэрин бэлэхтээтилэр. Маны сэргэ «Хомоҕой хоһоон» диэн аһаҕас хоһоон ааҕыытын күрэҕэ, көрдөөх-нардаах оонньуулар көхтөөхтүк ыытылыннылар.
Салгыы күн иккис аҥарыгар “Эрдии-2025” эр дьон икки ардыгар тыынан, салгын саанан ытыыга күрэхтэһии ыытыллыаҕа, киэһэ олохтоохторго анаан эстрада сулустара кыттыылаах эҕэрдэ кэнсиэрт буолара күүтүллэр.
Людмила Горохова