Олунньу 12 күнүгэр Өрөспүүбүлүкэҕэ Оҕо саас, Чурапчы улууһугар «Ыал саргыта» сыллары түмүктүүр, Саха сиригэр Аҕа дойдуну көмүскүүр Улуу Кыайыы 80 сылын көрсө «Дьиэ кэргэн, оскуола-биир ситим» профессор Г.П. Башарин аатынан Сылаҥ орто оскуолатын оҕолорун уонна көхтөөх, талба талааннаах төрөппүттэрин холбоһуктаах кэнсиэрэ үрдүк таһымҥа ааста.
Бу бырайыагы төрөппүт комитетын мунньаҕын быһаарыытынан былаан ылыныллан, бары түмсэн, олус сэргэх кэнсиэри көрөөччүлэргэ бэлэх ууннулар. Кэнсиэр саҕаланыан иннинэ «ТАЛБА ТАЛААН ТҮҺҮЛГЭТЭ» ийэлэр, аҕалар быыстапкалара биһирэбили ылла. Кылаастар бурдук ас, сүүйүүлээх оонньуу, агропроект чэрчитинэн гиипсэттэн оҥоһуктары, стикердэри атыылаатылар.
Кэнсиэри сир симэхтэрэ кырачаан кыргыттарбыт арыйдылар.
Олоххо көхтөөх көрүүлэрин, киһи быһыытынан үтүө майгыгытынан, үлэҕитигэр – хамнаскытыгар бэриниигитинэн, эппиэтинэстээх сыһыаннарынан үөрэнээччилэргэ, төрөппүттэргэ холобур буолаҕыт диэн туран оскуола дириэктэрэ Николай Викторович Дьяконов 13 актыыбынай төрөппүттэргэ махтал суруктары туттарда. Төрөппүттэрбит бары өттүнэн дэгиттэр талааннаахтарын нэһилиэнньэ биһирээтэ, кырдьык даҕаны, биһиги төрөппүттэрбит уран тарбахтарынан, нарын куоластарынан, имигэс үҥкүүһүттэринэн дьону сөхтөрдүлэр.
Кэнсиэр түмүгэр Арассыыйаҕа дьиэ кэргэн, Саха Өрөспүүбүлүкэтигэр Оҕо саас, биһиги улууска Ыал саргыта сылын түмүктээн туран, Аҕа дойдуну көмүскээччи, Кыайыы 80 сылын көрсө оскуола үөрэнээччилэрэ биһигини көмүскүүр аҕаларбытыгар 2025 сыл бэлиэтин туттардылар. Биһиги үөрэхпит кыһатын үөрэнээччилэрэ сахалыы куттаах, киэҥ билиилээх-көрүүлээх ыччат үүнэн-сайдан тахсарыгар, аата ааттанарыгар, бары бииргэ сомоҕолоһон оҕо иитиитигэр тэҥҥэ үлэлиэҕиҥ.
Собакина П.М. , иитэр үлэҕэ дириэктэри солбуйааччы.