Быйылгы үөрэх дьылыгар саҥа салайааччынан Никифоров Алексей Дмитриевич анаммыта. Чилиэннэринэн Собакин А.С., Захаров А.А., Беляев Дь.К., Семенов Ю.Н., Протодьяконов Д.А, Матвеев В.А., Иванов В.Г. буолбуттара.
Саҥа састаап директор Николай Дьяконовы кытта быйылгы үлэни, былааны торумнаспыттара. Былаан чэрчитинэн оскуола уолаттарын кытта дартска, автомат хомуйуутугар, тоһоҕо саайыытыгар, хомуур оонньууга хамаанданан күрэхтэһэн илин-кэлин түһүспүттэрэ. Түмүккэ биир очукуонан чорбойон, аҕа түмсүүтүн хамаандата кыайыылаах тахсыбыта.
3-с кылаас оҕолорун идэни билиһиннэрэр сыалтан Сылаҥнааҕы 5 нүөмэрдээх баһаарынай чааска экскурсия тэрийэн ыыттылар. Борисов Айсен Гаврильевич- 1 караул начальнига уонна Семенов Юрий Николаевич 1 караул суоппара ыксаллаах быһыыга-майгыга уонна уоттан сэрэхтээх буолууга, баһаарынньык диэн кимин оҕолорго кэпсээтилэр. Ону таһынан баһаарынай массыынаны көрдүлэр — иһиттилэр.
Муус устар саҕаланыыта «Сааскы куйуур» тэрээһиҥҥэ уолаттары сырытыннардылар.
Сыала-соруга, уол оҕону булка сыһыарыы, балыктааһыҥҥа иитии-өйдөтүү, уһуйуу буолар. Эбэни алаадьынан аһатыыттан саҕаланна, сиэр-туом тутуһулунна. Уолаттар сааскы куйуур туһунан элбэҕи биллилэр, балыктааһын мындырдардарыгар үөрэннилэр.
Байанайбыт бэлэҕин, биир буһарыы балыгы оҕолор өттүк хараланан бардылар, астыммыттарын биллэрдилэр. Аҕа түмсүүтүн салайааччытыгар Алексей Дмитриевичка уонна чилиэттэргэ оскуола кэлэктиибин аатыттан махталбытын тиэрдэбит.
П.М. Собакина, дириэктэри иитэр үлэҕэ солбуйааччы