Социалистическай Үлэ Дьоруойа Михаил Афанасьевич Федотов Алаҕар нэһилиэгин «Чаачыгый» колхуоһугар 1929 сыл ахсынньы 12 күнүгэр төрөөбүтэ. Быйыл төрөөбүтэ 95 сылын туолла.
1936 сыллаахха Алаҕар 7 кылаастаах оскуолатыгар үөрэнэ киирбитэ. Иккис кылааска үөрэнэригэр төрөппүттэрэ өлбүттэрэ. Аймахтарыгар иитиллэн баран өрөспүүбүлүкэтээҕи детдомҥа иитиллибитэ. Сэттэ кылааһы бүтэрэн баран профессиональнай-техническэй оскуолаҕа (ФЗУ) үөрэммитэ.
1944 сыллаахха бу оскуоланы бүтэрбитин кэнниттэн «Якутстрой» трескэ үлэҕэ ылыллыбыта. Үлэҕэ уопутуран, 1955 сыллаахха болуотунньуктар биригэдьиирдэринэн анаммыта.
1956 сыллаахха ЫБСЛКС уобаластааҕы кэмитиэтэ эдэр ыччаты Дьокуускай куораты тутарга ыҥырыы таһаарбытыгар биир бастакынан путевка ылан үлэлээбитэ. Дьокуускайдааҕы комсомол куораттааҕы кэмитиэтэ Михаилы ыччат-комсомольскай биригээдэни салайарыгар итэҕэйбиттэрэ. Эдэр салайааччы үлэ хаачыстыбатыгар уонна оҥорон таһаарыыны үрдэтиигэ сүрүн болҕомтотун уурбута.
1958 сыллаахха «Якутстрой» кэлим биригээдэтин салайааччытынан өрө таһаарбыттара. Бу биригээдэ бастыҥнар кэккэлэригэр сылдьыбыта.
ССРС Үрдүкү Сэбиэтин Президиумун 1958 сыл, атырдьах ыйын 9 күнүнээҕи Ыйааҕынан Михаил Афанасьевич Федотовка Ленин уордьанын уонна «Сиэрпэ уонна өтүйэ» кыһыл көмүс мэтээлин туттаран туран, Социалистическай Үлэ Дьоруойа үрдүк аат иҥэриллибитэ.
М. А. Федотов Дьокуускай куорат уонна Саха Өрөспүүбүлүкэтин уопсастыбаннай олоҕор актыыбынайдык кыттара. ССКП уобаластааҕы кэмитиэтин, ССКП Дьокуускай куораттааҕы кэмитиэтин чилиэннэрин, профсойуустар уобаластааҕы кэмитиэттэрин, өрөспүүбүлүкэтээҕи норуодунай хонтуруол кэмитиэтин чилиэннэринэн үлэлээбитэ.
Михаил Афанасьевич тутууга элбэх киһини үөрэппитэ, дьаһайбыта. ыччаты уһуйбута. Кинилэр айан-тутан таһаарбыт дьиэлэрэ киин куораппытыгар элбэхтэр, дьон-сэргэ көмүс-ньээкэ уйаларынан буолаллар.
Алексей СЛЕПЦОВ