И.Н.Винокуров аатынан «Айылгы” норуот айымньытын дьиэтэ оҕо-аймах чуор куолаһынан чугдаарда. Ол курдук, Анал байыаннай дьайыы кыттыылаахтарын оҕолоругар улуус баһылыгын Саҥа дьыллааҕы бырааһынньыга ыытылынна.
Хас биирдии кэлбит оҕоҕо Чысхаан оҕонньор сиэнинээн Хаарчааналыын аҕалбыт кэһиилэрин түҥэттилэр.
Бырааһынньык үөрүүлээх аһыллыытыгар Чурапчы улууһун баһылыга Степан Саргыдаев Саҥа Дьылынан эҕэрдэлээтэ:
— Эһиги аҕаларгыт биһиги иллээх-эйэлээх олохпут туһугар анал байыаннай дьайыыга ийэ, аҕа дойдуларын чиэстээхтик көмүскүү сылдьаллар. Эһиги аҕаларгыт — Арассыыйа дьоруойдара. Онон оҕолор, эһиги төрөппүттэргитинэн, аҕаларгытынан киэн туттуохтааххыт, оскуолаҕа үчүгэйдик үөрэнэн, үөрэхтээх, үтүө дьоһун дьон буола улаатыахтааххыт. Саҥа сылга биһиги хорсун хоодуот буойуннарбыт иллээх-эйэлээх олоҕу, кыайыыны уһансан, дойдуларыгар төннөн, дьиэ кэргэни үөрдэллэригэр, тапталлаах Чурапчыбыт, өрөспүүбүлүкэбит сайдарын туһугар үлэлииллэригэр баҕарабын. Саҥа дьыл аптаах күннэригэр аҕаларгытыгар сылаас истиҥ тыллары анаан, кыайыыны аҕалалларыгар күүстэ-уохта биэриҥ. Саҥа сылга ситиһиилэри, байылыат олоҕу, үөрүүнү-көтүүнү!
«Айылгы” НАДь иһинэн үлэлиир тыйаатыр куруһуогун иитиллээччилэрэ мустубут оҕолору аптаах саҥа дьыллааҕы остуоруйаҕа киллэрэн, «Алиса в стране чудес» айымньыга олоҕуран сэргэх дьүһүйүүнү туруорда. Оҕолор бары көрдөрүү дьоруойун Алиса мүччүргэннээх сырыыларын долгуйан, көмөлөһөн туран, сэҥээрэ көрдүлэр. Бырааһынньыктааҕы сарсыарданы ырыалаах-үҥкүүлээх кэнсиэр киэргэттэ, араас көрдөөх оонньуулар икки бүк сэргэхситтилэр.
Инесса Иванова, Айыллаана Игнатьева, Айалина Седалищева, Д.П.Коркин аатынан Чурапчытааҕы спорт-интэринээт оскуола 8-с кылааһын үөрэнээччилэрэ:
— Кыһыл Королева дьоруойун олус сөбүлээн көрдүбүт. Оруолу толорор кыыс олус итэҕэтиилээхтик, тылын улаханнык, доргуччу саҥарда. Ону сэргэ Горилла персонаһа күллэрдэ. Сыанаҕа тахсыбыт бары оҕолор наһаа үчүгэйдик үҥкүүлээтилэр, ыллаатылар, ордук таба үҥкүүтүн сэргээтибит.
Юлиан Семенов, Бахсы орто оскуолатын 3-с кылааһын үөрэнээччитэ:
— Наһаа үчүгэй бырааһынньык буолла. Оҕолор Саҥа дьыл ырыатын толорбуттарын сөбүлээтим. Бүгүн флешмоб үҥкүүлээтим уонна оонньууга кыттаммын минньигэс бириистэри сүүйдүм.
Света Ким, И.М. Павлов аатынан Чурапчы орто оскуолатын 3-с кылааһын үөрэнээччитэ:
— Чебурашканы кытта интэриэһинэй оонньуулары оонньоотум. Кэнсиэри сөбүлээн көрдүм. Уһуйааҥҥа бииргэ сылдьыбыт дьүөгэм Эвелина ыллаабытын иһиттим. Чысхаан оҕонньор элбэх минньигэстээх бадаарагы бэлэхтээтэ. Ону туттарарыгар Чысхаан оҕонньор сымыйа бытыктааҕын бэлиэтии көрдүм.
Тамерлан Илларионов, Д.П.Коркин аатынан Чурапчытааҕы спорт-интэринээт оскуола 1-кы кылааһын үөрэнээччитэ:
— Чысхаан оҕонньор бадаарагар үөрдүм. Онно мин сөбүлүүр сакылааттарым бааллар. Сыанаҕа горилла киирэн кэлбитигэр соһуйдум. Бүгүн Лабубуну, Чебурашканы уонна кролигы кытта оонньоотум.
Марфа Петрова.