С.К. Макаров аатынан Чурапчы гимназиятыгар саха тылын уонна литэрэтиирэтин учууталлара быраактыка сэминээригэр үлэлээтилэр.
Быйылгы үөрэх дьылыгар саҥа ыытыллар РПР (өрөспүүбүлүкэтээҕи бэрэбиэркэлиир үлэ), 9-с, 11-с кылаастар эксээмэннэригэр бэлэмнэнии тула ырытыһыы буолла. РПР 5-10-с кылаас үөрэнээччилэригэр кулун тутарга ыытыллыа. Бу РПР сорудахтарын, барыйааннарын туһунан методхолбоһук салайааччыта С.Н. Гоголева ырытта. Оҕолорбут тиэкиһи ааҕан баран өйдүүр, үөрэтэ сылдьар тиэмэлэрин билиилэрин бэрэбиэркэлиэхтэрэ. Итини сэргэ 9 кылаастар талар саха тылыгар сүрүн эксээмэҥҥэ хайдах бэлэмниирин, тиһиктээх үлэтин туһунан сыл ахсын элбэх оҕону ситиһиилээхтик туттартарар С.А. Новгородов аатынан Чурапчы орто оскуолатын учуутала Л.Е. Попова кэпсээтэ, сыаналаах сүбэлэри биэрдэ.
Сэминээр түмүгэр бу сылга ыытыллыахтаах тэрээһиннэр туһунан иһитиннэрии буолла. Сонун бырайыагы Н.Д. Субуруускай аатынан Болтоҥо орто оскуолатын учуутала С.М. Кривошапкина билиһиннэрдэ. Уот Субуруускай төрөөбүтэ 130 сылыгар аналлаах «Уот Боотурдар» диэн уолаттарга өй, успуорт күрэһэ ыытыллыа. Кимнээх, туохха күөн көрсүөхтэрэй? 5-6-с кылаас уолаттара төрөөбүт тыл баайын билиитигэр, өбүгэ оонньууларыгар, успуорка, байыаннай хаамыыга илин-кэлин түсүһүөхтэрэ. Итини таһынан бу ыйга «Эрилик Эристиин ааҕыылара», «Доосо ааҕыылара» түһүлгэтэ үгүс оҕону, уһуйааччыны түмүөҕэ.
Бука барыгытыгар үүммүт сылга саҥа-сонун толкуйдары, ситиһиилээх үлэни, чэгиэн туругу баҕарабыт!
Сардаана Гоголева