Суруналыыстыка эйгэтигэр бастакы хардыыларбын оҥорбут, сырдатар, суруйар эйгэҕэ уһаарыллыыны ааспыт тапталлаах “Саҥа олох” хаһыатым күн сирин көрбүт, маҥнайгы нүөмэрэ тахсыбыт күнүнэн күн бүгүн айа-тута сылдьар кэллиэгэлэрбэр, ытыктыыр бэтэрээннэрбитигэр, биир кэмҥэ үлэлээн ааспыт, алтыспыт бары доҕотторбор итии-истиҥ эҕэрдэбин ыытабын!
Бу күн ахтан-санаан ааһыам этэ 2002 сыллаахха үлэбин саҕалыырбар сүбэ-ама буолбут, үөрэппит-такайбыт настаабынньыктарбын. Бастатан туран махтана ахтабын бастакы эрэдээктэрбин Гаврил Гаврильевич Попову. Кини салалтатынан күүстээх хамаандаҕа киирэн суруналыыстыка куукунатыгар буһан-хатан тахсыбытым. Ол курдук, эппиэттиир сэкиритээрбит, суруйааччы Семен Романович Данилов – Роман Данилов, улахан уопуттаах суруналыыстар Светлана Смирникова, Алексей Слепцов, Раиса Сибирякова, үөлээннээхтэрим Светлана Борисова, Оксана Жиркова, наборщик Альбина Смирникова, корректор Вера Петрова, верстальщиктар Петр Смирников, Иннокентий Окоемов буолан хаһыаппытын нэдиэлэҕэ үстэ таһаарар этибит. Оччолорго редакционнай-издательскай холбоһук буолан хаһыаппыт бэйэбит типографиябытыгар бэчээттэнэрэ. Редакция типография диэн арахсыбакка бары биир иллээх дьиэ кэргэн курдук үлэлээбиппит. Олус истиҥник саныыбын типография үлэһиттэрин Светлана, Дмитрий Семеновтары, Аксинья Лыткинаны, Мария Саввинаны, Федор Протодьяконовы, Борис Васильевы, бухгалтербытын Наталья Дьячковскаяны, завхозпутун Афанасий Захаровы, суоппарбытын Дмитрий Филатовы, о.д.а.
Иккис редакторым Афанасий Афанасьевич Захаров буолар. Афанасий Афанасьевич саҥалыы көрүүлээх, сатабыллаах салайааччы буолара тута биллибитэ. Биһиги айар-тутар өттүгэр этиибитин барытын өйөөн, төһө кыалларынан олоххо киллэрэрэ. Кини кэмигэр үлэлиир, олорор усулуобуйабыт тупсубута. Редакция саҥа дьиэтэ тутуллан киирбитэ, эргэ дьиэ үлэһиттэр уопсайдара буолбута.
Мин аҕа саастаах көлүөнэни баттаһа кэлбит дьоллоохпун дии саныыбын. Кинилэртэн элбэххэ үөрэнэн, салҕыы кинилэр холобурдарыгар олоҕуран аны бэйэм кэннэ кэлбит эдэр суруналыыстары үөрэтээччи буолбутум. Ол курдук, Наталья Сибирякова, Айталина Лазарева, Аграфена Кузьмина курдук олус талааннаах кыргыттар кэлэн, хаһыаппыт биллэ сэргэхсийбитэ.
“Саҥа олохпун” санаатахпына өйбөр аҥардас үлэ эрэ буолбакка, араас элбэх тэрээһиннэрбит, көрүдьүөс түгэннэрбит, ырыа аргыстаах айаннарбыт, айылҕаҕа тахсыыларбыт харахпар бу баардыы көстөн кэлэллэр. Бары биир дьиэ кэргэн оҕолорун курдук тутуспутунан үөрүүлээх да, хомолтолоох да күннэргэ бииргэ буоларбытын истиҥник саныыбын.
Күн-бүгүн Людмила Владимировна Горохова салайааччылаах хортуулаахтык үлэлиир Елена Макаринская, Семен Жендринскэй, Лидия Попова, Аксинья Лыткина, Федор Протодьяконов, Наталья Сибирякова, Анна Захарова, Марфа Петрова, Дария Лыткина курдук суруналыыстардаах, үлэһиттэрдээх “Саҥа олох” редакциятын, коллективын үлэтин-хамнаһын туораттан сэргии көрөбүн, суруйууларын көтүппэккэ ааҕабын.
Өр кэмнээх тохтобул кэннэ, быйыл идэлээх эйгэбэр эргиллэн “Таатта” хаһыатын кылаабынай эрэдээктэрин дуоһунаһыгар үлэҕэ киирэн, “саҥа олохторбун” кытта ситимим өссө күүһүрдэ. Өрүү да маннык биир тэтимҥэ киирэн, хардарыта көмөлөсүһэн, иннибит диэки баран иһиэхпит диэн эрэллээхпин.
Галина ПОЛУСКИНА,
“Таатта” хаһыат кылаабынай эрэдээктэрэ.
Бэлэмнээтэ Сэмэн ЖЕНДРИНСКЭЙ