Тохсунньу 13 күнүгэр Арассыыйа Бэчээтин, бэчээт эйгэтин үлэһиттэрин идэлээх күннэрэ бэлиэтэнэр. Бу күн Дьокуускай куоракка көрдөрөр-иһитиннэрэр эйгэ үлэһиттэрин, суруналыыстары бэлиэтиир үөрүүлээх тэрээһиннэр ыытылыннылар.
Күнүс 1 № Бырабыыталыстыба дьиэтин саалатыгар үөрүүлээх тэрээһин буолан, идэ бастыҥнара Ил Дархан, СӨ Бырабыыталыстыбатын Бочуотунай грамоталарын, Махтал суруктарын, судаарыстыбаннай наҕараадалары туттулар. Манна Людмила Горохова салайар Чурапчы улууһун «Саҥа олох» хаһыат кэлэктиибигэр таһаарыылаах үлэлэрин, бэчээт эйгэтэ сайдыытыгар дьоһун кылааттарын иһин, Ил Дархан уонна Бырабыыталыстыба дьаһалтатын салайааччыта Георгий Михайлов Ил Дархан «Махтал суругун» туттарда. Саха Өрөспүүбүлүкэтин Инновацияҕа, сыыппара сайдыытыгар уонна инфокоммуникационнай технологияларга миниистирэ Петр Николаев «Саҥа олох» хаһыат шеф редакторыгар Елена Макаринскаяҕа үтүө суобастаах, таһаарыылаах үлэтин иһин, «Саха Өрөспүүбүлүкэтин бэчээтин туйгуна» бэлиэни туттарда.
Күн иккис аҥаарыгар Бэчээт дьиэтигэр хаһыат, сурунаал, телевидение үлэһиттэрэ кыттыылаах үөрүүлээх тэрээһин ыытылынна. ≪Сахабэчээт≫ тэрилтэ 2025 сыллааҕы үлэ түмүгүн таһааран, өрөспүүлүкэҕэ бастыҥ үлэлээх эрэдээксийэлэри бэлиэтээтэ. «Тыл күүһэ» куонкурус түмүгүнэн «Саҥа олох» хаһыат «Сетевое издание — 2025» номинацияҕа бастакы миэстэ буолла. СӨ бэчээтин туйгуна, СӨ суруналыыстарын сойууһун чилиэнэ Ольга Шепелева аатынан өрөспүүбүлүкэтээҕи куонкурус “Бастыҥ репортаж” анал аат хаһаайкатынан «Саҥа олох» хаһыат кэрэспэдьиэнэ Марфа Петрова буолла. Бу куонкурус Уус-Алдан улууһун “Мүрү саһарҕата”хаһыат көҕүлээһининэн, “Сахабэчээт” СӨ ГАТ, СӨ Суруналыыстарын сойууһун тэрийиитинэн ыытылынна.
Сыралаах үлэбитигэр өрүүтүн күүс-көмө буолар дьоммутугар, бэриниилээх ааҕааччыларбытыгар махталбытын тиэрдэбит! «Саҥа олох» хаһыаты ааҕыҥ, сэргээҥ, биһигини кытта бииргэ буолуҥ!
Людмила Горохова.