Атырдьах ыйын 15 күнүгэр биир дойдулаахпыт, уопсастыбаннай диэйэтэл, Бастакы Ил Дархан, билигин РФ сенатора Егор Афанасьевич Борисов 70 сааһын туолла. Бэлиэ даатаны көрсө, өрөспүүбүлүкэ үрдүнэн сыл устата араас хабааннаах дьаһаллар ыытыллаллар. Чурапчыга сыһыаран эттэххэ, атырдьах ыйын 8 күнүгэр өрөспүүбүлүкэ суруналыыстара кэлэн, пресс-тур тэриллибитэ. Оттон ааспыт нэдиэлэҕэ Дьокуускай куорат овальнай саалатыгар өрөспүүбүлүкэ салалтата, бииргэ үлэлээн-хамсаан, алтыһан ааспыт дьоно-сэргэтэ кинини эҕэрдэлээтилэр.
Атырдьах ыйын 21 күнүгэр Чурапчыга эбиэккэ диэри оскуола оҕолорун уонна эдэр ыччаты кытта көрүстэ. Кэнчээри ыччат араас ыйытыылары биэрдэ. Төлөй оскуолатын үөрэнээччитэ Сайаан Ильин оҥоһугун – хомпуур иһити, Одьулуун оҕолоро хомуйбут от чэйдэрин уонна уран тарбахтаах оҕолор оҥорбут мэллээх иһити, И.М. Павлов аатынан оскуолаттан Эрсан Макаров бэйэтэ уһаарбыт быһаҕын бэлэх ууннулар. Эдэр ыччаттар архыып-бибилэтиэкэҕэ виртуальнай тууру оҥорорго аналлаах бырагырааманы оҥорон биэрдилэр.
Эбиэт кэнниттэн Егор Афанасьевич “Айылгы” норуот айымньытын дьиэтигэр нэһилиэнньэни кытта көрүстэ. Нэһилиэнньэни дойду билиҥҥи балаһыанньата, бэлиитикэ, экология, тыа хаһаайыстыбата, эдэр ыччаты тыа сиригэр олохсутуу курдук боппуруостар долгуталлар. Бу ыйытыыларга киэҥ анаарыылаах, ырытыылаах хоруйдары иһиттилэр. Егор Афанасьевиһы кини кылааһынньыктара, “Сельхозтиэхиньикэҕэ” бииргэ үлэлээбит кэллиэгэлэрэ, тэрилтэ салайааччылара, нэһилиэктэр баһылыктара эҕэрдэлээтилэр. Улуус баһылыга Степан Саргыдаев дьонун-сэргэтин аатыттан сылгы үөрүн бэлэх уунна.
Түмүккэ, бука бары Егор Афанасьевичка сүгүрүйүү, киэн туттуу бэлиэтин туоһулаан, Чурапчы гиимнин сүрэхтэрин туттан туран ыллаатылар, ытыс дохсун тыаһын бэлэхтээтилэр.
Сандаара Ефремова, Болтоҥо оскуолатын 11-с кылааһын үөрэнээччитэ:
- Олус истиҥ көрсүһүү буолла, Егор Афанасьевичка уонна Прасковья Петровнаҕа улахан махталбын тиэрдэбин. Оҕолор элбэх ыйытыыны биэрдилэр, кинини кытта кэпсэтэн, хараҕым аһылынна, олус астынным. Мин “Лиидэр буоларга туох нааданый, лиидэр хаачыстыбата хайдах буолуохтааҕый?” диэн ыйытыы биэрдим. Ону кини: “Лиидэр буолар туһугар, ол туһунан толкуйдуо суохтааххын, саамай сүрүнэ үлэлиэххэ наада”, — диэн эппиэттээтэ. Кырдьыга да, оннук буоллаҕа.
Степан Саргыдаев:
— Егор Афанасьевичтан үбүлүөйгүн хайдах бэлиэтиэххин баҕараҕын диэн ыйытыыбытыгар дьоммун-сэргэбин кытта көрсүөм этэ, улахан тэрийии наадата суох диэн эппитэ. Онон кини баҕа санаатын толорон, биир дойдулаахтарын уонна эдэр ыччаты кытта көрсүһүүлэри тэрийдибит.
Ыччат да, дьон-сэргэ да элбэх ыйытыыларын биэрэн, онно сөптөөх хоруйдары истэн астыннылар. Оттон Егор Афанасьевич дойдутун дьонун көрсүбүтүттэн үөрдэ, махтанна.
Егор Афанасьевич үбүлүөйдээх 70 сааһын бэлиэтээһиҥҥэ өрөспүүбүлүкэҕэ Бырабыыталыстыба бэрэссэдээтэлэ Кирилл Бычков салайааччылаах хамыыһыйа тэриллэн турар. Бэлиэ даатанан бу сааскыттан саҕалаан араас дьаһаллар ыытыллаллар. Научнай-практическай кэмпириэнсийэлэртэн саҕалаан, төгүрүк остуолларга, кинигэ сүрэхтэниитигэр, дьыалабыай оонньууларга тиийэ. Онон биир дойдулаахпыт Егор Афанасьевич үбүлүөйдээх дьаһаллара үрдүк таһымнаахтык ыытылла туралларынан өрөспүүбүлүкэ салалтатыгар, Ил Дархан Айсен Николаевка, тэрийэр хамыыһыйаҕа Чурапчы дьонун аатыттан махталбын тиэрдэбин.
Егор Борисов:
- Туох санаалаахпын, толкуйдаахпын тиэрдээри, үлэлээн кэлбит уопуппуттан үллэстээри көрсүһүүлэри тэрийдибит. Истиҥ, дириҥ ис хоһоонноох көрсүһүүлэр буоллулар, олус астынан, үөрэн турабын. Онон маны барытын тэрийбит улуус баһылыгар Степан Саргыдаевка улахан махталбын тиэрдэбин.
Чурапчым дьонугар-сэргэтигэр махтанабын, түмсүүлээх буолуҥ, ыарахантан чаҕыйбакка, иннигит диэки сайдан баран иһиҥ диэн алгыыбын.
Елена Макаринская