Клава 1942 сыллаахха Дьокуускайдааҕы фельдшерскай-акушерскай оскуоланы бүтэрбитэ. Түөрт сыл атын сиргэ үлэлээн баран, Сылаҥ нэһилиэгэр анаммыта.
Онно кэлэн Чаҕылҕаннаах диэн сир илин өттүгэр турар балаҕаннаах ампаары ыраастаан, сууйан икки куойкалаах медпуну аһан салайбыта. Ылыннарыылаах тыллаах-өстөөх, кэлбит-барбыт сытыы кыыс салайар медпууна сотору кэминэн нэһилиэнньэ ортотугар аптарытыат ылан барбыта. Дьон-сэргэ мэдиссиинэ күүһүн, кини көмөтүн дириҥник өйдөөн испиттэрэ. Онон аҕыйах кэминэн медпуун эргэ таҥара дьиэтигэр көһөрүллэн кэҥэтиллибитэ. Аны биир сыл буолаат, сэбиэдиссэй туруорсуутунан, Бэрэҕэ Мугудай уонна Сылаҥ нэһилиэктэрин хабан эмтиир саҥа медпуун дьиэтэ тутуллубута.
Оччолорго, билиҥҥи курдук массыына, матассыыкыл дэлэйэ илигинэ, суһал көмөҕө наадыйар ыарыһахха эмчиттэр атынан-оҕуһунан, сороҕор сатыы, түүн-күнүс диэн аахсыбакка, сылдьаллара. Оннук элбэх сырыылартан Клавдия Гаврильевна биир түгэни хаһан даҕаны умнубатаҕа. Элбэх оҕолоох ыал ийэтэ оҕолоноругар табыллыбытаҕа. Төһө кыалларынан түргэн көмөнү эрэйэр суол этэ. Ытыс таһынар күһүҥҥү хараҥа түүн биэлсэр онно тиэтэйбитэ. Тиийиэхтээх сиригэр чугаһаабытын кэннэ аны Түөйэ үрэҕин уута хаайар. Ыксал дьэ буолар. Хата, дьолго, ыалдьыбыт дьахтар кэргэнэ ону сэрэйэн, утары кэлэн, билэр сиринэн сүгэн туоратан оҕолонооччуну өрүһүйбүттэрэ.
Клава кэлиэҕиттэн нэһилиэккэ санитарнай-чэбдигирдэр үлэ биллэрдик сэргэхсийбитэ, киэҥник тарҕаммыт ыарыылары утары сэрэтэр үлэлэр ордук киэҥ далааһыннаммыттара. Онон эдэр исписэлиис дьонун-сэргэтин улахан махталын ылбыта. Эмп-том кырыымчык кэмигэр, биирдэ, хантан да көстүбэт пенициллин биэс флаконун куораттан булан, Петя Макаров диэн сэбиргэхтэтэн өлөр ахсааҥҥа киирбит оҕону эмтээн үтүөрдүбүтүн кырдьаҕас эмчит кэлин да эмиэ умнубатаҕа…
Онтон салгыы Клавдия Гаврильевна Слепцова доруобуйа харыстабылын министиэристибэтигэр туруорсан Уһун Күөлгэ балыыһа дьиэтин тутуутугар үп көрдөрбүтэ. Хойукка диэри ол дьиэҕэ врачебнай учаастак баара.
Доруобуйа харыстабылыгар 31 сыл үлэлээн баран, кырдьаҕас биэлсэр 1973 сыллаахха биэнсийэҕэ тахсыбыта. Өр сыллаах үтүө суобастаах үлэтин иһин “Үлэҕэ килбиэнин иһин” икки мэтээлинэн, “Доруобуйа харыстабылын туйгуна” бэлиэнэн наҕараадаламмыта.
Клавдия Гаврильевна дьоллоох дьиэ кэргэн тапталлаах ийэтэ этэ. Слепцовтар биэс уоллаахтар. Кинилэр бары үлэ дьоно.
Киһи доруобуйатын харыстабылыгар эдэр сааһын, бүтүн олоҕун биэрбит эмчит дьонун-сэргэтин улахан ытыктабылын ылыан ылбыта.
Сэмэн Жендринскэй