Бүгүн, олунньу 24 күнүгэр, СӨ Ситэриилээх былааһын отчуота Чурапчы улууһугар саҕаланна. СӨ ОДьКХ уонна энергетика миниистирин бастакы солбуйааччыта Аян Кириллин салайааччылаах үһүс бөлөх Одьулууҥҥа уонна Хоптоҕоҕо үлэлээтэ. Мунньаҕы улуус баһылыгын солбуйааччы Алексей Лобанов салайда.
Отчуот саҕаланыан иннинэн Айыына, Семен Дьячковскайдарга, Васена, Дмитрий Капитоновтарга “Эдэр ыаллары дьиэнэн хааччыйыы” бырагыраама чэрчитинэн дьиэ туттарга, эбэтэр атыылаһарга ананар сибидиэтэлистибэни туттардылар.
Олохтоохтор улуус уонна өрөспүүбүлүкэ таһымыгар үгүс хабааннаах ыйытыылары биэрдилэр. Ол курдук, устудьуоннар олорор уопсайдарын төлөбүрэ ыараханын, тыа хаһаайыстыбатыгар үүт, субвенция харчытын, «Хатан» тэрилтэ үлэтин туһунан ыйыталастылар, «Чурапчы — Дьокуускай» хайысханан сылдьар автобус араспысаанньатын дьоҥҥо сатабыллаах гына уларытарга туруорустулар.
Чурапчытааҕы аграрнай — техническай колледж дириэктэрэ Василий Гуляев бу үөрэх кыһата өрөспүүбүлүкэҕэ биир бастыҥ көрдөрүүлээҕин билиһиннэрэн туран, ОДьКХ-тын өҥөлөрүн төлүүр үп көрүллүүтэ ыараабытын этэн туран, ОДьКХ систиэмэтин реформатын туһунан туоһуласта.
Оскуола дириэктэрэ Иннокентий Бекянов оскуола 118 оҕото уонна колледж 500 -тэн тахса устудьуона биир спорт саалаҕа дьарыктаналлара табыгаһа суоҕун, баппаттарын этэн туран саҥа спорт саала тутуллуутун туруоруста.
Нэһилиэк олохтооҕо Анатолий Ефремов 2014 сыллаахха нэһилиэктэрэ ууга барбытыгар сүрдээх элбэх буор кэлэн сүөһүлэр уулуур Таатта үрэхтэрэ буорунан көмүллэн, билигин кыстык ортото уолан хааларын, сүөһүлэр көһө сылдьан уулуулларын этэн туран дириҥэтии үлэтин ыытарга, Бөтүгүттэ – Одьулуун суолун өрөмүөнүн туруоруста.
Антон Аржаков нэһилиэк уот ситимин саҥа СИП — кабельга уларытыыны, урукку сибээс линияларын ыраастааһыны, Одьулуун нэһилиэгэ “Зона затопления” статустан тахсыытын туоһуласта.
Нэһилиэк ытык кырдьаҕаһа Иван Артемьев сири кытта үлэни күүһүрдэргэ, кырыы учаастактары сайыннарарга саҥа бырагырааманы, тыа сиригэр дьону олохсутарга үлэни күүһүрдэргэ туруоруста.
Нэһилиэк баһылыга Людмила Ефремова нэһилиэккэ орто анал үөрэх кыһатыгар улуус кииниттэн оҕолор автобуһунан сылдьалларын, онуоха Бөтүгүттэттэн Одьулууҥҥа диэри суол аварийнайын этэн туран өрөмүөнү, Үрэх Күөрэҕэ саҥа хочуолунайы туруоруста. Маны сэргэ, Саха биллиилээх фольклору хомуйааччыта, кыраайы үөрэтээччитэ.Дмитрий Дьячковскай – Сэһэн Боло памятнигын оҥорууга көмөлөһөллөрүгэр көрдөстө.
Түмүккэ байыаннай дьайыыга сырдык тыына быстыбыт Алексей Петровка ананан кэлбит «Воинская доблесть» мэтээлин ийэтигэр туттарылынна.
Өрөспүүбүлүкэ Ситэриилээх былааһын ааспыт сыллааҕы үлэтин одьулууннар сөптөөҕүнэн сыаналаатылар.
Людмила Горохова.