Мария Черноградская, Валерий Толстоухов Мугудай нэһилиэгин туруу үлэһит ыала буолаллар.
Мария Алексеевна «Чуораанчык» уһуйааҥҥа, Валерий Семенович «Чурапчы» ТХПК Мугудайдааҕы пищекомбинатыгар үтүө суобастаахтык үлэлии сылдьаллар.
Тыа ыала буолалларын быһыытынан, сүөһү ииттэн олороллор. Быйыл саас Амматтан саҥа төрөөбүт ньирэйдэри атыылаһан аҕалан көрө-истэ сылдьаллар. Алаастарыгар оттуу барыах иннинэ сыл аайы ыал тэлгэһэтин охсон, бугуллаан баран тиэйэн аҕалан далларыгар кэбиһэн иһэллэр. Отонноотоххо оҥоойук туолар дииллэринии, быйыл да биир оту туруордулар. Дьиэ таһыгар оттонор буолан хаачыстыбата олох үчүгэй. Иҥэмтиэлээх буолара саарбаҕа суох.
Бэйэлэрэ үлэлииллэрин таһынан, сиэннэрин үлэҕэ сыһыараллар, кинилэргэ холобур буолаллар. Валерия уонна Виолетта сайынын ньирэйдэрин бэйэлэрэ көрөллөр, сир астыыллар, окко да көмөлөһөн эрэллэр.
Дьиэ кэргэн туруктаах буолара эбэттэн эһэттэн тутулуктааҕын бэркэ өйдөөн, сахалыы тэринэн олорор ыалга уйгулаах, байылыат олоҕу баҕарыаҕыҥ.
Ульяна Слепцова