Үс хонуктааҕыта Мындаҕаайы Кыстык Кугдатыгар 22 саастаах эдэр уол ууга түспүтүн туһунан ыар сурах кэлбитэ.
Улуус кииниттэн быыһыыр сулууспаттан, Ис дьыала уорганын сотрудниктара, олохтоох дьаһалта, аймахтара итиэннэ Дьокуускай куораттан водолазтар кэлэннэр түүннэри-күннэри көрдөстүлэр.
Оттон бүгүн, Мындаҕаайы бөһүөлэгиттэн 5-6 биэрэстэ тэйиччилээх сиргэ ааһан иһэр балыксыттар уол өлүгүн буллулар.
“Биһиги кылааһынньыкпыт Игнатьева (уруккута Флегонтова) Елена Николаевна уола. Хатас нэһилиэгин олохтоохторо, уол аҕата Григорий Иванович. Ваня мореман, 185 см үрдүктээх, хайыһардьыт бэрдэ, кыахтаах бөҕө уол этэ… Хата көһүннэ”, — диэн бобуулаах ситим нөҥүө суруктарыттан таһаарабыт.
Уол өлүгэ чахчы көстүбүтүн туһунан Чурапчытааҕы суһал быыһыыр сулууспа салайааччыта Николай Терютин бигэргэттэ.
Сэмэн ЖЕНДРИНСКЭЙ