Күн-дьыл туран биэрэн, Чурапчы улууһун үрдүнэн оттооһун биллэ тэтимирдэ.
Тыа хаһаайыстыбатын уонна ас-үөл бэлиитикэтин министиэристибэтин сүөһү аһылыгын бэлэмнээһиҥҥэ суһал ыстааба иһитиннэрэринэн, атырдьах ыйын 21 күнүнээҕи туругунан, 285 927,9 туонна от кэбиһилиннэ, ити кыстыыр от 66%-гар тэҥнэстэ.
Маныаха, Мындаҕаайы бөһүөлэгэр “Сайдыы” фермерскэй хаһаайыстыбатын баһылыга Данил Павлов оттоон бүппүтүн туһунан иһитиннэрдэ.
“Барыта холбоон 1400 устуука рулон, былааннаабыппыт курдук 280 туонна от оттонно.Итини таһынан эрдэ 1500 туонна сенаһы бэлэмнээбиппит. Оппутун таһыыга уолум Харитон, Егор Новгородов, Алексей Харитонов, Егор Диодоров уонна Амма орто оскуолатын 10 кылааһын үөрэнээччитэ Олег Климов күүс-көмө буоллулар, улаханнык махтанабын.
Итини сэргэ билигин маҕаһыыннарга уонна чааһынай дьоҥҥо атыыга таһаараарыбыт бэҕэһээ 5 туонна хортуоппуйу хостоотубут. Үүнүү үчүгэй! Бэҕэһээ барыллаан ааҕыы түмүгүнэн 1 гааттан балай эмэ үүнүү кэлииһи. Уопсайа холбоон 21 гаа сиргэ “Гала” уонна “Розара” суорт хортуоппуй олордуллубута.
Бу иннинэ “ТЗК” диэн эрдэ туһанылла сылдьыбыт транспортер ылбыппыт, инньэ гынна бааһынаттан үлэбитин чэпчэтэн комбайн-тан тутатына самосвал массыынаҕа түһэриэхтээхпит. Комбайн бункера бэйэтэ 6 туонналаах ол аата алта туоннаны хомуйан бараммыт “Камаз” кэллэҕинэ биирдэ кутан кэбиһиэхтээхпит. Ол транспортер улахан туонналаах куулларга кутар ити үлэбитин түргэтэтэр. Комбайн-ҥа түөрт киһи туруоҕа, икки массыына таһыаҕа, биир хранилище оператора баар буолуоҕа. Халлааммыт эрэ туран биэрдэр…” – диэн Данил Данилович кэпсээтэ.
Сэмэн ЖЕНДРИНСКЭЙ