Бу күннэргэ Мындаҕаайы сэлиэнньэтигэр Боччохоччу алааһыгар аҕыс тыраахтыр эбиэс ыһыытыгар тахсаннар, уон киһилээх Данил Павлов биригээдэтэ күн-бүгүн 50-ча гаа сиргэ эбиэс бурдугу ыһан саҕалаата.
Данил Данилович сир үлэтигэр ылсан үлэлэспитэ балачча эмэ ыраатта, сахалар этэллэринии “сиһин этэ ситэн, буутун этэ буһан” бу хайысхаҕа биллэ уопутурда, уустук үлэ эриирдээх моһоллоруттан чаҕыбакка эриллэн-мускуллан, бэйэтэ туспа көрүүлээх үлэһит буола, сайыҥҥы өҥүрүк куйааска үгүстүк буста-хатта.
“Эбиэс бурдугу бэҕэһээҥҥиттэн ыһан саҕалаатыбыт, сир үлэтигэр тахсыбыппыт төрдүс күммүт. Уҥуоргу хочолуун аахтахха барыта холбоон 200 гаа буолара буолуо. Ону таһынан 65 гаа сиргэ сэлиэһинэй бурдугу ыһыахтаахпыт. Билигин 8 тиэхэньикэ тахсан үлэлии сылдьар.
Хортуоппуйга үс-түөрт күнүнэн биирдэ киирэрбит буолуо, 25 гаа сиргэ олордоору былаанныыбын. Быйыл эмиэ улууспут дьаһалтатын кытары дуогабардаһаммыт 100 ыалга хортуоппуй олордоммун аны күһүн хостоотохпуна тарҕатыахтаахпын. Быйыл сажалка, сеялка, транспортер уонна тырахтарыыстарга анаан рациялары ылаттаабытым”, — диэн Данил күн былдьаһыктаах үлэтин кэмигэр быыс булан сэһэргээтэ.
Сэмэн Жендринскэй