Күн-сарсын Мындаҕаайы бөһүөлэгин оскуолата 95 сыллаах үбүлүөйүн бэлиэтээри бэлэмнэнэр. Ол аата Болугур нэһилиэгэр үөрэхтээһин 1930 сыллаахха саҕаламмыт.
Ааспыт кэм быыһын сэгэтэн көрөр эбит буоллахха, Быттына хочотугар турар Үрдүк Өтөх сиригэр Мииһэ атыыһыт уола Матвей Фомин-Маппый учуутал, Афанасий Михеев диэн киһи дьиэтин ылан биир кылааһы арыйан баҕалаах оҕолору үөрэтэн саҕалаабыт. Нөҥүө сылыгар о.э 1931 сыллаахха, Кугдаҕа, кинээс Соркуоп дьиэтин ыланнар иккис кылааһы арыйаллар. Инньэ гынан бүгүн үөрэх төрүттэммит сиригэр өйдөбүнньүк стелла туруорулунна.
Үөрүүлээх дьаһалга Матвей Фомин сиэнэ Матвей Матвеевич Фомин уонна күтүөттэрэ Дмитрий Иосифович Стручков, “Болугур нэһилиэгэ” тыа сирин түөлбэтин баһылыгын солбуйааччы Дмитрий Сазонов, кыраайы үөрэтээччи Алексей Диодоров кэлэннэр кыттыыны ыллылар. Бырайыак ааптарынан, Роман Константинов аатынан Амма орто оскуолатын түмэлин салайааччыта Ольга Борисова буолар.
“Бырайыак олоххо киирбититтэн бары даҕаны улаханнык үөрдүбүт, долгуйдубут. Бу барыта биир эрэ киһи үлэтэ буолбатах, манна үгүстүк сүбэ-ама буолан, каартатыгар тиийэ булан биэрэн, туруоруохтаах миэстэбитин ыйан биэрбит, нэһилиэк биллэр кыраайы үөрэтээччитэ Алексей Алексеевичка, стелла эскииһин оҥорон биэрбит Сардана Романовнаҕа, оҥоһугу чочуйбут маастардарбытыгар Спиридон Николаевичка, Семен Самсоновичка, оҥоһуллар матырыйааллары буларга көмөлөспүт Туллук Петровнаҕа, кинигэ быһыытын-таһаатын лазернай технологиянан оҥорбут Игорь Васильевичка уонна туох баар үлэни өйөөбүт, тэрийсибит салайааччыларбытыгар дириҥ махталбытын биллэрэбит. Инникитин даҕаны үлэ тула түмсэммит, өйү-санааны түмэн үүнүү-сайдыы суолун тутуһа туруоҕуҥ”, — диэн Ольга Михайловна эттэ.
Сэмэн ЖЕНДРИНСКЭЙ